Accessibility links

дүшәмбе, 5 декабрь 2016, Казан вакыты 07:30

Tatarstan rişwätçelek belän köräşne üzennän başlıy


Pänceşämbe könne, Qazanda İdel-buyı federal okrugına kergän cirle parlament başlıqları cıyılıp, assotsiatsiä utırışın ütkärde. Cıyılışta Rusiä Prezidentınıñ İdel buyı federal okrugındağı wäkile Sergey Kirenko da qatnaştı. Assotsiatsiägä Başqortstan, Mari El, Tatarstan, Udmurtiä, Çuaşstan respublikaları, Tübän Novgorod, Penza, Samara, Perm, Ulyanovskiy töbäkläreneñ parlament citäkçeläre kilde. Assotsiatsiä utırışın Tübän Novgorod qanun çığaru cıyılışı başlığı Yevğeniy Lulin alıp bardı. Assotsiatsiä, cirle parlamentlar belän fikerläşep, federal qanunnarnı töbäklär mänfäğätlärennän çığıp üzgärtü häm qabul itü öçen oyıştırılğan ide. Bu utırışınıñ kön tärtibenä rişwätçelek belän köräşneñ qanunı yulları, terrorğa häm rişwätçelekkä qarşı köräşneñ torışı, İdel buyı federal okrugında Ciñüneñ 60 yıllığın bilgeläp ütü kebek mäs’älälär qaraldı. Utırışnıñ başında Sergey Kirienko, Tatarstan kütärep çıqqan mäs’älälärne kiräkle buluın häm täqdimnäreneñ qabul itelüen bilgeläp ütte. Färit Möxämmätşin assotsiatsiä utırışında zur xisap belän çığış yasadı. Rişwätçelek iminlekkä qurqınıç tudırırlıq däräcägä citte, dide ul. Federal däräcädä rişwätçelekkä qarşı toru qanunı bulmaw säbäple, töbäklärdä bu küreneş belän köräşü qıyınlıqlar tudıra, dip bilgeläp ütte. Tatarstanda rişwätçelek belän köräş programması belän cıyılışta xökümät räise urınbasarı Rawil Muratov tanıştırdı. Ul bäysez belgeçlär ütkärgän tikşerenü näticäläre belän tanıştırdı. Soraştıru nätciäläre, barlıq ölkälärgä dä rişwätçelekneñ ütüp kerüen kürsätkän.

Rawil Moratov, Tatarstanda rişwätçelek belän köräşkä totunı maqsatın Boris Akunin äsärendä kürgän obrazlar yaxşı añlata, dide. Anda pravoslav dine wäkile yaña bilgelängän töbäk başlığına, köräşne üzennän başlarğa täqdim itkän. Bez dä Tatarstanda köräşne üzebez xakimiättän başlıybız, dip äytte.

Soñınnan, cıyılışta qabul itelgän qararda Rawil Moratovnıñ rişwätçelekkä qarşı köräş programması yaqlaw taptı. Şulay uq, Däwlät Dumasına korrupsiägä qarşı toru federal qanunın qabul itüne tizlätergä, digän täqdim dä kertelde.



Bikä Timerova.

XS
SM
MD
LG