Accessibility links

җомга, 9 декабрь 2016, Казан вакыты 01:05

Gruziä parlamentı ildäge urıs ğäskärennän tizräk qotılırğa teli


Gruziä parlamentınıñ ildäge Rusiä xärbi nığıtmaları, ägär dä üzara kileşügä ireşelmäsä, inde kiläse yıl başına uq yabılırğa tieş digän qararın Rusiäneñ saqlanu ministrlığı kisken tänqitläp çıqtı. Mäskäw, Gruziä parlamentında bertawıştan qabul itelgän şuşı qarar üzara kileşü eşenä yardäm itmi dip isäpli.

Gruzin parlamentı utırışında qatnaşuçı bar 159 deputat ta yaqlap çıqqan bu qararda, ägär dä xökümät 15-nçe mayğa qädär Rusiä yağı belän Batum häm Axalkalaki yanındağı ike xärbi bazanı yabunıñ tögäl waqıtın bilgeli almasa, alar inde kiläse yıl başında uq yabılaçaq dielä. Parlamentnıñ şuşı qararı xökümät öçen mäcbüri tügel, şuña da qaramastan, bu gruzin deputatlarında ilne Rusiä ğäskärlärennän azat itü teläge köçle buluın kürsätä häm ildäge başqarma xakimiatkä dä, Rusiä yağına da şul xaqtağı söyläşülärne tizlätü kiräklegenä işarä itä. Tawış birüdän soñ deputatlarnıñ berse Giga Bokeria bolay dide:

Audio, Giga Bokeria

"Bu belderüdä bez diplomatiä öçen kübräk waqıt biräbez. Gärçä Rusiä diplomatiäse inde niçänçe märtäbä Rusiädä xärbi nığıtmalarnı çığaru teläge bulmawın raslasa da. Anıñ Gruziädäge şuşı nığıtmaları sovet xakimiateneñ qaytawazı bulıp tora häm alar biredä gruzin xalqınıñ telägenä qarşı qala birä" di Gruziä parlamentı äşzası Giga Bokeria. Tiflistäge parlament xäzer, ägär dä Rusiä gruzin yağı taläplären qabul itmäsä, anıñ Gruziädäge xärbi nığıtmaları qanuni tügel dip iğlan iteläçäk häm xökümät Rusiä xärbilärenä vizalar birüne tuqtataçaq dip kisätä. Gruziä parlamentında şundıy qırıs qarar qabul itelüne räsmi Mäskäw başta kürmämeşkä salışsa da, soñraq moña möğämäläsen saqlanu ministrlığınıñ matbuğat wäkile däräcäsendä belderergä buldı. Väçeslav Sedov İTAR-TASS agentlığına, Gruziä parlamentı qararı ike arada bu mäs''älädä barğan söyläşlärgä kirtä genä qora, gruzin deputatları üzläreneñ çınbarlıqtan yıraq toruın kürsätte dip belderde. Anıñ süzlärençä, älege problema ber-bereñä ul''timatumnar quyıp qına xäl itelä almıy. Rusiäneñ Däwlät Dumasında BDB eşläre komitetın citäklägän Konstantin Zatulin isä tağın da qırısraq qaraş bäyän itä - ul "Rusiä moña, Gruziägä yağulıqnı qıybatraq bäyägä satu häm Könyaq Osetiä wä Abxaziä mäs''äläsendä qatıraq toru belän cawap qaytarırğa tieş dip belderä. Mäskäw elegräk, üzeneñ Batum häm Axalkalaki tirälärendäge xärbi nığıtmaların çığaru öçen 10 yıl kiräk bulaçaq dip äytkän ide, xäzer inde kimendä 3-4 yıllıq waqıt turında süz alıp bara. Gruziädä yaqınça 4 meñläp urıs ğäskärie urnaşqan häm alar nigezdä andağı qorallarnı häm xärbi cihazlarnı saqlaw belän genä mäşğül. Mäğlüm ki, elekke sovet ğäskärlären Könçığış Yevropadan çığaru iqtisadi problemalarğa kitergän ide, annan qaytqan xärbilärgä torır urın bulmadı, östäwenä xärbi mölkät, şul isäptän qorallar da küpläp urlandı. Mäskäw xäzer şunıñ qabatlanuınnan qurqa. Ğäskärlärne çığaru finans çığımnarğa da bäyle, moña, Mäskäw belän Tiflis arasında söyläşülärneñ däwam itüe xaqında söylägändä, comğa könne Rusiä tışqı eşlär ministrı Sergey Lavrov ta işarä yasadı.

Audio, Sergey Lavrov

Ämma mäs''äläneñ şaqtıy möhim säyäsi yağı da bar, di xärbi eşlär belgeçe Aleksandr Goltz:

Audio, Aleksandr Goltz

"Töp mäs''älä bulıp biredä Rusiäneñ üz xärbi qüwäten, kiräk bula qalsa eş itärgä äzer buluın kürsätü teläge tora, bigräk tä Kavkaz tösle qatlawlı töbäktä" di Aleksandr Golts. Rusiäneñ xärbi nığıtmaları Gruziädä genä tügel, kürşe Ärmänstanda da bar, läkin Azärbaycan belän kierenke mönäsäbätlärdä torğan ärmän xökümäte ildäge urıs xärbilärenä bik cılı mönäsäbättä.

Kärim Kamal
XS
SM
MD
LG