Accessibility links

шимбә, 3 декабрь 2016, Казан вакыты 09:50

“Tatar qızı” layıqlını ezli


“Tatar qızı” bäygesen berençe itep tatar yäşläre byurosı belän berlektä Qazan däwlät universitetınıñ şärıqnı öyränü institutı talibäläre başlap cibärdelär. Bu xaqta tatar yäşläre forumınıñ başqarma byurosı liderlarınıñ berse Mönirä Säğidullinanıñ fikere belän tanışıp kitik

Tatar studentları, tatar qızları arasında “Tatar güzäle” ütkärü bezneñ inde ul ideyä tatar yäşläre byurosında tudı dip äytergä bula. Tatar studentların aktivlaştıru, bergä tuplawnı maqsat itep şuşı bäygene ütkärergä buldıq. Bügenge köndä törle cıyılışlar, konferensiälär belän genä yäşlärne bergä tuplaw mömkin tügel. Ä bu yarışnı studentlar üzläre oyıştırdılar. Kongressqa kilep şundıy ber çara oyıştırasıbız kilä dip Könçığış tellär institutı qızları miña möräcäğät ittelär. Ul qızlar Bötendönya tatar yäşläre forumında da aktiv qatnaşqannar ide. Bezneñ millät yäşläreneñ berdämlekkä omtılu xisläre sizelä başladı. Şundıy çaralar ütkärgändä bu xislär tışqa bärep çığa.

Bäygedä könçığış tellär fakul'tetında uquçı biş qız qatnaştı. Alarnıñ sälätlären Bötendönya tatar yäşläre forumı byurosınıñ liderları Nail Zaripov, Mönirä Säğidullina, İlşat Ğıymadiev, Älfiä Miñneğalieva bäyälädelär. Konkursta ciñgän tutaş universitet külämendäge bäygedä qatnaşaçaq.

Yarışta qatnaşuçılar ”Kem ul çın tatar qızı?” sorawlarına da üzençälekle cawapların birdelär. Bäygedä ciñü ayulağan şul uq institutnıñ ğäräp telen öyränü bülegeneñ berençe kurs talibäse Elmira Ğarifullinanıñ bäyälämäsen tıñlarğa täqdim itäbez

Minem uylawımça qızlar alar bik törle bula. Läkin, tatar qızı tıynaq, aqıllı bulırğa tieş. Şulay uq, alar olı keşelärne xörmät itärgä burıçlı. Bigräktä äti-änilärne häm uqıtuçılarıbıznı. Annan soñ dinebezne dä onıtırğa tieş tügellär. Minem uylawımça mondıy qızlar Qazanıbızda bik küp häm monıñ öçen min bik söyenäm. Bu bäygedä qatnaşuım, ciñüem belän min dekanıbız Cämil äfände Ğabdulxak ulına, şulay uq Kamil äfände Ğosman ulına bik zur räxmätlemen, duslarıma da bik zur räxmätläremne äytäsem kilä. Duslar bulmasa, bälki min bu yarışta ciñmäs idem dä, alar miña rux östäp tordılar

Kiçäne alıp barğan şul uq institut yegetläre Azat Xörmätullin belän İlsur Näfiqov tutaşlarnıñ tatar zıyalıların ni däräcädä belülären, şäfqät tutaşları rolenä quyıp qıyulıqların, xalqıbıznıñ mädäniätenä, tarixına qağılışlı sorawlar, tatar cırçıların belü, üzlären Tatarstan respublikası prezidentı, Tufan Miñnullin urınına quyıp törle problemalarğa cawap tabarğa tırışu diseñme, bäräñge ärçetep citezleklären, icadi sälätlären tikşerü bäygelären ütkärdelär. Yarış millilek ruxların “Tatar qızı”na däwalawçı qızlarda ğına tügel, qarap utıruçı tamaşaçı qızlarnı da uylanırğa mäcbür itte. Alar da üz fikerlären äytergä aşıqtılar. KDU studentı Liliä İsxaqova “Kem ul çın tatar qızı? ” digän sorawğa mondıy cawap birde

Tatar qızı digändä närsä küz aldına kilä. Ägär dä ence-märcännär belän tulğan sandıqnı küz aldına kitersägez, menä bezneñ cämğiätneñ xatınsızların şul ence-märcännär belän çağıştırırğa bula. Ä menä tatar qızı digännärebez inde alar şuşı sandıq eçendä yatuçı asıl taşlar. Alar tösle ber keşe dä yuq bu dönyada. Min bu bäygedä törle fikerlär işettem. Östäp şunı ğına äytäsem kilä, tatar qızında böten äyberdä bar

Äye, tatar qızları da, milli canlı, telebezgä, dinebezgä, ğöref-ğadätlärebezgä tuğrı yäşlär artqannan arta bara. Läkin, bu äle barsı da alda-göl digän süz tügel. Ni qızğanıç, çit il muzıkasın, mädäniäten üzlärenä tağarğa tırışqan yäşlär massası da kimergä telämi. Qızıq, bezneñ tatar qızlarıbız yäştäşlärenä turı yulğa çığarğa ölge bula alsalar, alar manqortlıqtan çığarğa köç tabarlar mikän?

Röstäm İsxaqov

XS
SM
MD
LG