Başqortstan Tatar ictimağıy üzäge räise Ayrat Ğiniätullin citäkçelegendäge wäkillek Qazanğa eş säfäre belän kitte. Älege wäkillek anda 11 mart könne Bötentatar ictimağıy üzägeneñ Zäki Zäynullin citäkçelek itkän qanatı qorıltayında qatnaşa.
Soñğı köngä qädär diärlek Başqortstan Tatar ictimağıy üzäge wäkilläreneñ Qazanğa baraçağı bilgele tügel ide. Ni öçen digändä, Qazanda Tatar ictimağıy üzägeneñ ike qanatınıñ ayırım-ayırım qorıltaylar oyıştıruı Başqortstan tatar milli oyışmalarına oşap betmi. «Mart ayında Zäki Zäynullinnıñ qorıltay ütkärüye, ä aprel başında Räşit Yağfärov citäklägän Tatar ictimağıy üzägeneñ üz qorıltayın cıyuı tatar milli xäräkäteneñ haman tarqawlıqqa yünäleş aluın kürsätä, – dip belderde Başqortstan Tatar ictimağıy üzäge räise Ayrat Ğiniätullin. – Ä Rusiädäge bolay da qatlawlı älege şartlarda tatar milli xäräkäteneñ ayırım törkemnärgä bülgälänüye ber dä faydağa tügel». Şuşı uq fikerne belderep, Başqortstan Tatar cämägätçelek oyışmaları berlege bu atna başında Bötentatar ictimağıy üzägeneñ kiläçägen küzallağan ber möräcägät qabul itte. Ul möräcägätne şunda uq Qazandağı ike tatar ictimağıy üzägenä häm andağı qayber räsmi şäxeslärgä dä cibärdelär. Möräcägättä tatar ictimağıy üzägeneñ uzğan yıllarda başqarğan zur eşlärenä yuğarı bäyä birelä. «Bötentatar ictimağıy üzäge tuqsanınçı yıllarda tatar milli xäräkäteneñ başında tordı häm başqa milli oyışmalarğa ürnäk häm alarnı millät mänfägätlären yaqlawğa iärtüçe buldı, – dip äytelä möräcägättä. – Xäzerge şartlarda Bötentatar ictimağıy üzägeneñ ikegä bülenüye isä milli xäräkätneñ köçen zäğifländerügä kiteräçäk. Şuña kürä dä Başqortstan tatarları Bötentatar ictimağıy üzägen kiläçäktä berböten oyışma itep kürergä teli. Bu xäl Başqortstan Tatar ictimağıy üzägenä dä kiläçäkkä üz maqsatların anıq bilgeläwne ansatlaştırır ide». Menä şuşı töp fiker äytelä Tatar cämägätçelek oyışmaları berlege utırışında qabul itelgän möräcägättä. Älege belderüne Başqortstan Tatar ictimağıy üzäge räise Ayrat Ğiniätullin Qazanda bügen ütüçe qorıltayda da yañğıratırğa tieş.
