Accessibility links

шимбә, 10 декабрь 2016, Казан вакыты 08:10

Mäskäw Qazannı qotlıy


14 martta Mäskäwneñ iñ zur konsert zalı Rossiädä Qazannıñ meñ yıllığına bağışlanğan “Mäskäw Qazannı täbrikli” dip atalğan tamaşa bulıp uzdı. Biş ay buyı äzerlängän bu tamaşanı oyıştıruçılar, xalıqqa konsert kürsätü genä tügel, ike meñ yarım keşe sıyarlıq tamaşa zalına mömkin bulğan qädär danlıqklı millättäşlärebezne dä cıyunı da maqsat itep quyğannar. Bäyrämdä tanılğan ğalimnär dä, danlıqlı sportçılar da, iseme bilgele bulğan artistlar da küp ide. Bäyrämneñ başınnan başlıyq äle. Oçraşunı, bu bäyrämne oyıştıruçılar açıp cibärde. Säxnägä Mäskäw milli mädäni möxtäriäte räise Räsim Aqçurin. Mäskäw merınıñ berençe urınbasarı Lüdmila Şvesowa, Mäskäw duması räise Vladmir Platonov kütärelde. Räsim Aqçurin xalıqnı bäyräm belän qotladı häm süzne Lyüdmila Şvesowağa birde. Lüdmila Şvesowa üzeneñ çığışında Qazan belän Mäskäw arasında küptännän inde ayırım ber kileşü bar. Bez eş qına Qazanda bulabız. Ä inde çığışları belän Qazannan Tatarstannan bulğan keşelär öçen Mäskäw ikençe watan bulıp tora. Alarğa biredä dä üzläreneñ telen , mädäniätın üsterü mömkinlekläre tudırılğan dide. Bäyrämdä qunaqlar küp ide. Tatarstannan da küp sanlı qunaqlar bulaçaq dip iglan itelsä dä, barısı da kilä almağan. Läkin iñ möhim qunaq, Qazan şähäre merı Kamil İsxaqov bu bäyrämgä bitaraf qalmağan. Ul başta rusça söyläsä dä, çığışın tatarça däwam itep, bäyräm öçen räxmäten belderde häm Qazan tarixı turında söyläde.. Säxnäneñ bizäleşe xaqında da äytep ütäsem kilä. Çönki programma belän bizäleş üzenä kürä tulı yañğıraş taptı. Säxnädä Qazan häm Mäskäw Kremlläreneñ Spass manaralı yanında Mäskäw Kremlendäge Biklemeş manarası häm Qazannıñ Söyembikä manarasın sürätlägän ide. Häm bäyräm başında ber bersenä iärep, ike tawışlı azan yañğıradı. Xalıq monı Qazanda başlanğan azannı Mäskäw däwam itä dip küz alladı. Tamaşa programması Fuat Mansurov citäkçelegendä Bol'şoy teatr orkestrınıñ Näcip Cixanov äsären uynaw belän başlandı. Konsertta yäş talantlarğa, balalarğa da zur urın birelgän ide. Qazan qızı, Braziliälärdä tanılıp qaytqan Daniä Ğobäydullina Mäskäwgä Qazan sälämen citkerde. Anıñ sälämen Mäskäw qızı Aliä Yaqupowa qabul itep, üz çiratında ul Qazannı 1000 yıllığı belän qotladı. Balalarnıñ tatarça häm rusça çığışları ber simvolikanı kürsätte. Konsertta çığış yasawçılarnıñ barısın da äytep betergä dä mömkin tügel. Konsert 4 säğät däwam itte. Şulay da äytmi dä bulmıy. Tanılğan kinoartist Sergey Şaqurov, min üzem Mäskäwdä tusam da, minem ätiem Tatarstannıñ Täteş rayonı, Baqırçı awılınnan dide häm Möxämmät Sadrinıñ rus telendä Qazan turındağı şiğıren uqıdı. Bari Alibasov citäkçelegendäge “Na-Na” törkeme saf tatarça itep “Umırzaya” cırın başqardı. Şulay uq Bol'şoy teatrdan Rinat Arifullin, Marat Ğäliäxmätäv, İrinä Bikqolowa, klassik biyüçelär Liliä Musawarowa, Aydar Axmetov çığışların xalıq köçle alqışlar belän ozattı. Biyüçe Liliä Sabitowa citäkçelegendä balet törkeme dä çığış yasadı. Ğarmunçı Aydar Ğaynullin, yäş talantalar skripkada Arslan Säyfi, fortepianoda Säriä Raxmani uyınnarı da xalıqnı tañ qaldırdı. Cırçılarıbız Renat İbrahimov, Nailä Fatexowa, Roza Xabibullin çığışların tamaşaçı köçle alqışlarğa kümde. Roza Xabibullina häm ul citäklägän Ayqay törkeme başqaruında berençe tapqır Röstäm Nevretdinov köyenä yazılğan “Qazanım” digän cır başqarıldı. Kiçädä tatar millätennän bulğan sportçılar küp ide. Alıp baruçılar alarnıñ isemnären atadı. Häm alarğa süz äytü mömkinlegen dä birde. Alina Kabaeva, 9 tapqır dönya çempionı bulğan Ğälimä Şögerowa,. şulay uq futbolçı Marat İzmaylov da üzläreneñ qotlawların belderdelär. Ä menä küp tapqırlar velosport buyınça dönya çempionı bulğan Ğaynan Saidxucin saf tatarça äytte qotlawın. Konserttan soñ min qayber millättäşlärebez belän dä söyläşep bu oçraşu, bäyräm turında fikerlären beleştem. Mäsälän bügenge köndä Germaniäneñ Münxen şähärendä yäşäwçe danlıqlı ğälim Räşit Syünyäyev, bu bäyräm öçen maxsus kilgän. Şul tikle yuldan kilgänegezgä ükenmädegezme, oşadımı sezgä dip soradım min annan. Häm ul rus telendä, "min äle tamaşadan başqa, bergä uqığan, bergä eşlegen duslarımnı da oçrattım. Bu oçraşu minem küñeldä zur ğorurlıq xise uyattı" dip belderde. Bäyräm konserttan soñ da däwam itte. Qunaqlarnı häm oyıştıruçılarnı konserttan soñ Çäk-çäk restoranı qunaq itte. Häm qunaqlarğa bu bäyräm öçen maxsus çığarılğan qatnaşuçılarnıñ räsemnäre, alar xaqında yazmalar birelgän katalog taratıldı.

Näzifä Kärimova, Mäskäw

XS
SM
MD
LG