Accessibility links

пәнҗешәмбе, 8 декабрь 2016, Казан вакыты 05:06

Bilgelängän prezidentnıñ wazifaları kiñäyäme?


Däwlät Şurasınıñ 14 mart utırışı, parlament tarixında, iñ qısqa buldı, dip yazdı gäzitlär. Häm tağın ber üzençälek. Mart ayına ber yulı 2 utırış bilgelängän. Berençesendä töp qanunğa üzgäreşlär kertelde, ikençesendä - prezidentqa wäkälätlär birü waqiğası bulaçaq.

14 mart utırışında, töp qanunğa ber genä üzgäreş kertelde. Respublika citäkçesen "xalıq tarafınnan saylaw" mätdäse "parlament tarafınnan raslaw" mätdäsenä üzgärtelde.

Yaña tärtiplärgä qarağanda Tatarstan citäkçeseneñ wazifaları da kiñäyä. Ant itep, wazifağa kergännän soñ, prezident Tatarstan başqarma xakimiät oyışmalarınıñ federal ministrlıqlar belän kileşep eşläw öçen genä tügel, üzidärä xakimiät oyışmaları häm ictimaği berläşmälär belän mönäsäbätlär qoru öçen dä cawap biräçäk. Respublika citäkçese 5 yılğa bilgelänä. Qanunğa üzgäreşlär 2nçe häm 3nçe uqılışta qabul itelde.

Deputatlar, Tatarstan prezidentın saylaw turındağı qanunnı üzgärtmäskä buldı, barı anıñ ütäleşen tuqtattı. Üzäk häm cirle saylaw komissiäläre, saylawlar häm referendum turındağı qanunnarnıñ qayber öleşleläreneñ qullanışı tuqtatıldı. Şunıñ belän, ber keşeneñ 2 tapqır ğına prezident itep saylanu mäsäläse aktualleğen yuğalttı. Däwlät Şurasında xäzer Rusiä prezidentı Vladimir Putinnan xat kötälär. Mintimer Şäymievqa wazifalar birü turındağı xat kilgännän soñ, nämzätne raslaw mäsäläse şunduq Däwlät Şurası utırışında qaralaçaq. Bu xaqta Färit Möxämmätşin xäbär itte. Bu waqiğanıñ tögäl köne xäbär itelmi, ämma başqa mäğlümatlarğa qarağanda Däwlät Şurasınıñ bu aydağı ikençe utırışı 24 martqa bilgelängän.

Cämäğätçelekneñ iğtibarın cälep itkän ikençe mäsälä - munitsipal berämleklärdä cirle üzidarä oyışmaların formalaştıru turındağı qanun buldı. Ul berençe uqılışta qabul itelde. Biredä dä, citäkçelärne xalıq tarafınnan saylaw mömkin qädär kimetelgän. Yaña munitsipal berämlek başlığı munitsipal parlament wäkillärennän saylanaçaq. Ä ul, awıl sovetları wäkillärennän torırğa tieş. Awıl şuraların ğına cirle xalıq saylıy. Andıy saylaw tärtibe, berençe waqıtta ğına bula, dip xäbär itelä. Törle gäzitlär moña törle-törle bäyä birde, berse – xakimiättä oçraqlı keşelär bulmas, ikençeläre - xalıqnıñ inde üzidärägä dä täesir itü mömkinlege qalmadı, digän fiker belderde.

Bikä Timerova

XS
SM
MD
LG