Accessibility links

якшәмбе, 11 декабрь 2016, Казан вакыты 05:22

Räşit Ğälämov: "Putin belän Şäymievnıñ iñ uñışlı maxsus operatsiäse"


Tatarstannıñ citäkçese itep Rusiä prezidentı Vladimir Putin tarafınnan Mintimer Şäymiev täqdim iteläçäk digän xäbär äle dä iğtibar üzägendä. Bu xaqta säyäsi belgeçlär dä, deputatlar da, ğadi xalıq ta söyläşä häm küpçelek tatarstanlı älege faktnı uñay bäyäli. Respublika matbuğatında da bu könüzäk tema bulıp tora. Anda bilgele häm bilgesez keşelär üzläreneñ mönäsäbätlären belderä, iske-yaña respublika citäkçese, şuşı uñaydan Tatarstannıñ kiläçäge turında fikerlären citkerä. Şunısı qızıq, töbäk citäkçelären bilgeläwne küplär demokratiädän çigenü, dip sanasa da, Tatarstan citäkçese itep Mintimer Şäymievnı quyuğa xätta oppozitsiädäge keşelär dä tiskäre mönäsäbät kürsätmäde.

Säyäsi fännär doktorı Rafiq Möxämmätşin dä, xäzerge wazğiättä Tatarstannıñ citäkçese itep yañadan Mintimer Şäymievnıñ bilgelänüenä uñay qarıy. Monıñ säbäpläre berniçä, dip añlata ul:

Audio: Tatarstan Rusiädä iñ möhim töbäklärneñ berse. İldä säyäsi, xoquqi üzgäreşlär waqıtında Tatarstanda nindider kardinal üzgärtülär kertü, citäkçelekne almaştıru, respublika öçen dä, Rusiä öçen dä uñay näticälärgä kitermäs ide. Citmäsä, Rusiädäge ğämäli säyäsätçelär arasında Mintimer Şäymiev berençe unlıqta. Anıñ alıp barğan säyäsäte ezlekle buldı. Şuña kürä, Rusiädäge şuşındıy awır säyäsi şarlarda anı alıştıru, ul ğäyre tabiği küreneş bulır ide. Kiläçäkkä kilgändä isä, minemçä, Tatarstan öçen genä tügel, Rusiä öçen dä, anda federativ mönäsäbätlärne saqlap qalu öçen üzäk belän respublika arasındağı şartnamäne yañartu kiräk. Şäymiev tä monı assızıqlap äytte. Çönki federatsiä şartlarında töbäklär Mäskäw quşqannı ğına eşläp utırırğa tieş tügellär, çönki töbäklärneñ üz mänfäğätläre, üzäkneñ – üzeneke.

Tatar-inform agentlığı citäkçese Räşit Ğälämov isä, Vladimir Putinnıñ Tatarstan citäkçese itep Mintimer Şäymievnı täqdim itü xäbäre ber yaqtan kötelgän bulsa, ikençe yaqtan – şaqtıy sensatsion yañğıradı, dip sanıy:

Audio: Respublikanıñ küpçelek citdi keşeläre öçen Tatarstanda Şäymievnı alıştırırlıq keşene tabu bik awır buluı açıq ide. Läkin andıy xäbärlär haman kötelmägänräk yañğırıy inde. Qayber säyäsi törkemnär öçen bu yañalıq ayaz küktäge yäşen kebek buldı, çönki qayberäwlär respublikada xakimiät alışınuğa äzerlänä başlağannar ide inde. Min älege xäbärne bik uñay bäyälim. Putin häm Şäymiev kilep tuğan wazğiättän Rusiä öçen dä, Tatarstan öçen dä qulay çişeleş taptılar. Ni disäñ dä, Şäymiev Tatarstan belän idärä itä ala torğan real şäxes, ul bik küplärne qänäğätländerä. Ul Rusiädä federalizm nigezlären saluçılarnıñ da berse. Şuña da, bu bilgelänü Vladimir Putin säyäsäteneñ töbäklärgä, kire federalizmğa taba borıluı, dip ömetlänäse kilä. Ğomumän, min monı Putin belän Şäymievnıñ iñ uñışlı maxsus operatsiäse, dip atar idem, çönki soñğı 3-4 yılda respublikanıñ yawlağan pozitsiälären saqlap qalu bik zur şik astında ide.

Tatarstanda belgeçlär Mintimer Şäymievnı respublika citäkçese itep bilgelänüenä menä şundıy fikerdä toralar.

Gölnaz İlgizär

XS
SM
MD
LG