Accessibility links

шимбә, 3 декабрь 2016, Казан вакыты 18:46

AQŞta qoral satu belän bäyle 17 keşe qulğa alındı


Qoral terrorçılar qulına nindi yullar belän barıp ireşä? AQŞta räsmi röxsätsez qoral satqan çeltärgä qatnaşı buluda ğayeplänep 17 keşe qulğa alınğan. Alar arasında ärmännär häm Könyaq Afrika watandaşları da bar. İdänastı çeltäre Rusiädän raketa, granata atqıçlar häm başqa törle qorallarnı Quşma Ştatlarğa satıp yatqan. Şuşı yul belän satılğan qoralnıñ terrorçılar qulına elägü ixtimalı borçılu uyata.

Prokurorlar, törle qorallar, şul sanda tanklarğa qarşı raketa sistemaları Könçığış Yevropa illärennän Quşma Ştatlarğa cibärergä äzerlängän buluın belderä. Könçığış New York prokurorı David Kelley, qulğa alınğan keşelär yılğa yaqın küzätü astında buldı, di:

"Qulğa alınğannarnıñ 5se – Ärmänstan, Gruziä häm Könçığış Yevropanıñ başqa illärennän törle xärbi qoral, alar arasında qanatlı raketa atqıçlar häm cir-hawa raketaların Amerika Quşma Ştatlarına kertergä tırışuda ğayeplänä."

Süz qoral turında barsa da – küpläp üterü qoralın satu küzätelmägän:

"Tikşerü barışında tıñlanğan 15 meñgä yaqın söyläşü, täwlek äylänä küzätülärdä – qulğa alınğan keşelärneñ uran yäki başqa törle ximik yä biologik qoralğa iä bulu ixtimalına işarälär bulmadı," dide New York prokurorı David Kelley.

Älege çeltärneñ ike yulbaşçısı bilgelängän – alar New York häm Los Angelesta yäşäwçe ärmän watandaşlığına iä bulğan Artur Slomonyan häm New Yorkta yäşäwçe Könyaq Afrikalı Christiaan Dewet Spies. Tağın bersen, Vato Maçitidze''nı Manhattanda qulğa alunı televidenie kanalı da kürsätte.

5 keşegä zararlı maddälärne yulda yörtüdä, 13 keşegä röxsätsez qoral satuda ğayepläwlär belderelgän. 13 keşeneñ bersen äle dä ezlilär.

Federal Tikşerülär Bürosı (FBİ) mäğlümatlärenä qarağanda, qoral Al-Qaida belän bäyläneştä torğan ber keşegä satılası bulğan. Aña başta Ärmänstandağı saqlağıçta töşerelgän räsmnär kürsätelgän. Satuçılar, qoralnıñ terror maqsatında qullanılaçağın belgännär. FBİ agentı Andy Arena:

"Cinäyät eşe – Holliwood filmnarınnan kim tügel. Ämma film qanunnarınnan ayırmalı bularaq – bügenge çınbarlıqnı kire qağıp bulmıy," dide FBİ agentı.

Amerikan räsmiläre süzlärenä qarağanda älege çara Gruziä häm Ärmänstannıñ tärtip saqlaw köçläre belän berlektä oyıştırılğan. AQŞ yustisiä ministrlığınıñ elekke prokurorı John Loftus, Azatlıq radiosına, Rusiä räsmire dä tikşerüdä barışında yardäm itte, dip belderde.

İnde satuğa quyılğan qorallar turında ber-ike süz. Äytik, tankka qarşı Hornet raketası, qoral belgeçläre mäğlümatlärenä qarağanda, Quşma Ştatlarda citeşterelgän Abrams tankın şartlata ala. İgla raketası oçqıçnı bärep töşerä ala.

FBİ xäbärlärenä qarağanda, qulğa alınuçılar New York, Los Angeles häm Miami''da 6 avtomat satqan, tağın da citdiräk qoral kiterüne wäğdä itkän bulğan. Amerikan şähärläre metrolarında şartlatır öçen uran tabu mömkinlekläre turında da söyläşengän bulğan. Böten belderelgän ğayepläwlärgä dälillär tabılğan xäldä bu keşelärgä här bersenä 30 yılğa qadär törmä cäzası yanıy.

Alsu Qormaş
XS
SM
MD
LG