Accessibility links

якшәмбе, 4 декабрь 2016, Казан вакыты 23:23

Putinneñ Şäymievne Tatarstan citäkçelegendä qaldıruı kem öçen ciñü bulıp tora?


Prezident Miñtimer Şäymievneñ Tatarstan citäkçelegendä tağın berniçä yılğa qaluı töp waqiğälärneñ berse bulıp qala, xörmätle tıñlawçılar. Sişämbe kiçen Rusiä prezidentı Vladimir Putin Tatarstannıñ Däwlät Şurasına inde üz täqdimen cibärde, anda ul kötelgänçä, respublika başında Miñtimer Şäymievneñ qaluın täqdim itä. Bu kem öçen ciñü bulıp tora soñ?

Älege sorawğa cawaplar Mäskäwdä ber törle, Qazanda isä beraz başqaçaraq yañğırıy, xörmätle tıñlawçılar. Şäymievneñ Putin kertkän qağidälärne qabul itep, üzen Mäskäw täqdime nigezendä parlamentta raslatu belän kileşüen qayberäwlär Rusiä prezidentı öçen zur ciñü dip bäyäli - älegä qädär ul xalıq tarafınnan saylawnı beterüe öçen Könbatış xökümätläre tarafınnan tänqitlänep kenä kilgän ide, ä inde Miñtimer Şäymiev kebek üzen Rusiä şartlarında çağıştırmaça möstäqil totqan citäkçeneñ dä Putin qağidäläre nigezendä eş itärgä buluı Rusiä prezidentınıñ qazanışı ul dilär, misal öçen, Mäskäwdä. Andağı Carnegie üzägendä eşläwçe federalizm belgeçe Alexey Titkov, Şäymievne üz yağına awdarıp Putin ikençe ber ölkädä dä üz pozitsiäsen nığıta dip isäpli.

Audio, Alexey Titkov

"Putin yağınnan Miñtimer Şäymiev kebek qüwätle töbäk citäkçeseneñ yaña xakimiat qoru sistemasına üze teläp küçüen kürsätü teläge bar ide, çönki älegä qädär yañaça bilgelängän berniçä gubernatornıñ yä citäklägän töbäkläre alay uq möhim tügel ide, yä inde alar üzläre tämam köçsez wä bilgesez, xakimiattäge waqıtları çığıp kilgännäre ide" dip añlata Alexey Titkov. Sişämbe kiçen Putin formal'' töstä Tatarstannıñ Däwlät Şurasına Miñtimer Şäymievne respublika citäkçese itep bilgeläwne täqdim itkän xat cibärde. Anıñ şuşı täqdime xäzer 14 kön eçendä qaralırğa tieş bulaçaq. Xalıq tarafınnan prezident itep öç märtäbä saylanğan Şäymievneñ xakimiattäge mötdäte kiläse yıl yazında tämamlanırğa tieş ide. Ul haman da Tatarstandağı idarä dilbegäsen üz qulında nıq totqan citäkçe bulıp qala. Häm Vladimir Putinneñ anı respublika başında kiläçäkkä dä qaldıru teläge artında Mäskäwneñ Qazandağı citäkçelek belän urnaşqan totrıqlı mönäsäbätlären älegä saqlap qalırğa tırışuı tora di Qazandağı säyäsi fännär doktorı Rafıyq Möxämmätşin.

Audio, Rafıyq Möxämmätşin

Şäymiev üze dä xakimiateneñ berençe çiratta ictimaği-säyäsi totrıqlılıq belän bäyle buluına, başlağan reformaların azağına qädär citkerergä teläwenä basım yasıy. Dürtençe märtäbä dä raslanırğa cıyınuı turında beldergändä ul Tatarstannıñ federal'' üzäk belän yaña kileşü tözep yatuı xaqında belderep, bu eşneñ şaqtıy awır baruına işarä yasadı. Rafıyq Möxämmätşin, Putinneñ Şäymievne Tatarstan citäkçelegendä qaldıru niäte yaña kileşü tözügä bäyle bula ala digän faraz da belderde.

Audio, Rafıyq Möxämmätşin

Şäymievneñ zur baylıqqa, mömkinleklärgä iä bulğan Tatarstan potensialın Putin belän säyäsi alış-bireştä osta qullanuına Alexey Titkov ta iğtibar itä. Anıñ fikerençä, täcribäle säyäsmän bularaq Şäymiev här ğämälen berniçä adım alğa qarap qıla.

Audio, Alexey Titkov

"Minemçä, ul şuşı adımınıñ här mömkin näticäsen inde yaxşı itterep isäpläp çığarğan häm ul üz xälen hiç kenä dä naçaraytam dip uylamıy. Şäymiev şäxsän üzeneñ häm zur milek wä aqçağa, küpsanlı saylawçılarğa iä Tatarstannıñ kiläçäktä Putin öçen ni däräcädä ähämiatle bulaçağın bik yaxşı añlıy" di Alexey Titkov, Rusiädäge federalizm belgeçe. Ä inde uramdağı ğadi xalıq, yuğarıda fikerläre kiterelgän belgeçlärdän ayırmalı bularaq, "Miñtimer Şäymievneñ kiläçäktä dä Tatarstan citäkçese bulıp qaluına niçek qarıysız?" digän sorawğa üz cawabın birä:

Audio, vox populi

Kärim Kamal

XS
SM
MD
LG