Rusiädä iñ yaxşı sirk qayda dip sorasalar, sirk artistları: “Tömändä!”,- dip cawap birer. 2004 nçe yıl yomğaqları buyınça iñ tırış xatın-qız kem soñ? 8 nçe Bötenrusiä “Direktor goda” bäygesendä Tömän sirqı mödire Färzänä Xälilowa ciñüçe dip tanıldı diplom häm medäl belän büläklände.
Şähär üzägendäge sirk binası tömänlelärneñ dä, qunaqlarnıñ da ixtbarın cälep itä. Bişpoçmaqlı pıyaladan ğına dip äyterlek salınğan mondıy bina bütän ber qayda da yuq. Bu binanı sirk mödire Färzänä Xälilowa häm arxitektor proyıqtlawçı Litovqanıñ urtaq xıyallarınıñ tormışqa aşuı dip äytsäñ dä bula. 2004 nçe yıl Färzänä xanım öçen iñ awır yıl buldı. Tömän ölkäseneñ 60 yıllığına august ayına binanı ölgertergä kiräk ide. Xälilova:
-Bügenge köngä iñ yaxşı sirk bezneke. Narodnıy artistlar kilde, Däwlät büläge laureatı artist Nuğzarov kilde. Alar menä Swetnoy bul''wardağı sirk belän çağıştırdılar. Äytätelär, Swetnoy bul''wardağı sirktan äybäträk kilep çıqqan. Böten uñaylıqları belän. “Üzebezneñ öygä kiläbez”. Hiçnindi problemnar yuq.
Älbättä nindider zur plannı tormışqa aşırğaç, qayberäwlärneñ küñelendä tınıçlanu sizelä. Ämma Färzänä Xälilova yuğarıda utıruçı türälärneñ işeklären şaqudan tuqtamadı. «Bulğaç-bulğaç, iñ yaxşısı bezdä bulırğa tieş”,- di ul. Xälilova:
-Bezneke berençe urında tora, planda tora gostinitsa artistlarğa.
-Ä ul qayda bulaçaq inde ägär dä tözelä qalsa?
-Tözelä qalsa, bezneñ sirk yanında bulğalı tieş. Yıraqta alar yäşärgä tieş tügel. Alarnıqı monda häywannarı, alarnıqı repetitsiä irtännän.
-Ä urın biräme soñ şähär xakimiätläre?
-Äle belmim. Plannar bar. Küptän tügel şul sorawnı kütärgän idem. Otvet yuq äle. Skoro otvet birgäle tieşlär.
Üzeñneñ iñ buldıqlı citäkçe xanım ikäneñne başta töbäktä dälillärgä kiräk. 2004 nçe yılnıñ axırında Färzänä Xälilovağa gubernatornıñ maqtaw qäğäze häm medäl tapşıralar. Annan soñ ciñüçelär Bötenrusiä bäygesenä Mäskäwgä cıyıldı. Bäygedä 39 ölkädän 249 xanım qatnaştı.
Xälilova:
-Min uylamağan idem, miña diplom häm medäl birerlär dip. Minem öçen zur büläk dip isäplim. Söyendem. Min bit Tobolskiy rayonda awılda üskän.
Tubıl rayonınıñ sazlıqlar arasına urnaşqan mäñge yulsız Kükrände awılı qızı 23 yıl inde Bötenrusiä sirk berläşmäsendä eşli.
Färzänä Xälilovanıñ eş bülmäsendäge diwarnıñ berse räxmät xatları, törle diplomnar, bäygelärdä ciñgän qäğäzlär belän tulğan. Alar arasında anıñ şähär külämendä iñ yaxşı it qızıdra belüçe, yağni şaşlıq yasawçı digän tanıqlığı da bar.
Xälilova:
-Buş waqıtımda min tıñ peşerenergä yaratam. İrtän 5 lärdä toram, 7 gä eşkä kitkänçe kuxnyada yal itäm. Uylayım minem ikençe yaratqan eşem min bardım.
-Sez yasıy torğan qızdırmanıñ sere barmı berär törle?
-Üzem genä belä torğan ser: Min uyladım böten uçastniklar ittän qılırlar şaşlıq dip. Min balıqtan qıldım şaşlıq. Raz saz cirendä üskäç min balıqtan qıldım şaşlıq. İ böten keşeneñ ise kitte- minem şaşlıq balıqtan.
Rusiädäge 41 sirknıñ 40 nıñ mödire ir-at. Xanım beräw genä-Färzänä Xälilova. Här kön tamaşa qararğa kilgän 1600 tamaşaçını da üze qarşı ala ul. Tormış şartları awır ğäilälärgä buşqa biletlar öläşä. Balalar yortları yätimnäre härwaqıt añarda qunaqta. “Kiñ küñelle bulu minem yäşäwemneñ mäğnäse ul”,- di Färzänä Xälilova. Kiläse atnada “Quality Hotel-Tumen” qunaqxanäsendä Bötenrusiä bäygesendä qatnaşqannar öçen kiçä bulaçaq. Ciñü medalen Färzänä xanımğa şunda tapşıraçaqlar.
Nail Alan,Tömän
Nail Alan,Tömän
