Accessibility links

якшәмбе, 4 декабрь 2016, Казан вакыты 21:29

Tatarstan deputatları Putinnıñ xatın kötä


Räsmi mäğlümätlärgä qarağanda, Mäskäwdän respublikağa Vladimir Putinnıñ yaña Tatarstan citäkçesen täqdim itkän xatı inde cibärelgän dä ikän. Däwlät Şurasında anı ozaqqa suzmıyça qararğa äzerlänälär. Anı kötkän arada deputatlar başqa eşlär belän mäşğül.

Mäsälän, Şuranıñ räise Färit Möxämmätşin çärşämbe könne Çallıda buldı. Anda ul Berdäm Rusiä firkäse Çallı bülekçäseneñ xisap-saylaw cıyılışında qatnaştı. Xäbärçebez süzlärenä qarağanda, Möxämmätşin firkä eşendä iñ aktiv qatnaşuçılarğa räxmät süzlären citkergän.

Rusiädä xärbi xezmätkä yazğı çaqırılış başlanıp kitte. 15 martta şuña bäyle inde ber xäbär dä citkerelde. Xäzer Tatarstanda çaqırılış komissiäsen Mintimer Şäymiev üze citäkliäçäk. Elek bu wazifanı başqarğan Zilä Wälieva häm respublikanıñ xärbi komissarı Rim Mustaev – anıñ urınbasarları.

2005-2007 yıllarda respublikanıñ awıl mäktäplären modernizatsiäläw, alarnı üzgärtü programması eşliäçäk. Bu xaqta sişämbe könne Tatarstannıñ Fän häm mäğärif ministrı Räis Şäyxlislamov jurnalistlarğa söyläde. Älege programma qısalarında uquçıları az bulğan awıl mäktäpläre yabılıp, andağı uquçılar yaqın tirädäge zurraq uqu yortlarına yörep belem alaçaq. 2005 yılda ğına da 24 mäktäp yabılaçaq, 204 uqıtuçı häm mäktäp xezmätkäre eşsez qalaçaq.

Çärşämbe könne Qazanda Xorlar assambleyası açıldı. Salix Säydäşev isemendäge Zur konsertlar zalında uza torğan älege qızıqlı çarada Qazannan ğına tügel, ä Sankt-Peterburgtan, Mäskäw, Tomsk, Sember häm başqa Rusiä şähärlärennän xor kollektivları qatnaşa. 21-29 martta Tatarstanda Mäcit Ğafuri isemendäge Başqort däwlät akademiä drama teatrı çığış yasayaçaq. Başqortstan artistları aldan Çallıda üzläreneñ spektakllären täqdim itäçäk. 25-29 mart könnärendä isä kürşe artistlarnıñ çığışın qazanlılar qarıy alaçaq.

Gölnaz İlgizär

XS
SM
MD
LG