Accessibility links

сишәмбе, 6 декабрь 2016, Казан вакыты 20:57

TİÜ berläşergä oşamağan


Zäki Zäynullin, Yunıs Kamaletdinov çığış yasağan matbuğat oçraşuı şimbä könne ütkän qorıltay näticälärenä bağışlandı. Şimbädä ütkän qorıltay cämäğätçelektän yäşerep ütkärelgän bulıp çıqtı. Qorıltaynıñ näticäläre belän tanıştırğanda, Yunıs Kamaletdinov, bu berläşterü qorıltayı buldı, küplär añlatqança talaşu qorıltayı tügel ide dide. Qorıltay ütü urını yäşeren bulsa da, anıñ eşendä, Yunıs Kamaletdinov süzlärenä qarağanda, ictimaği üzäkneñ 20 bülekçäse wäkilläre qatnaşqan. Alarnıñ 7se Tatarstannan çittä bulğan ictimaği üzäk wäkilläre.

Qorıltay älegä qädär ictimaği üzäk räise dip sanalğan Räşit Yäğfärovnı 20 martqa qädär wazifalarınnan azat itärgä digän qarar qabul itkän. Bügenge köndä Milli Şura dip atalğan milli oyışmalar berlegen citäklägän Räşit Yäğfärov bu qararnı tanımıy. Häm april başında Tatar ictimaği üzägeneñ tağın ber qorıltayın ütkäräçäk. Dimäk, Yunıs Kamaletdinov räis bulıp saylanğan qorıltay berläşterep ük betermägän bulıp çığa.

Monnan tış, şimbädä ütkän qorıltayda dürt räis urınbasarı da saylanğan. Alar, moña qädär dä bulğan, läkin xäzer inde yä tarqalğan, yä eşçänlegen tuqtatqan törle oyışmalarda räis, räis urınbasarları bulıp eşlägän Zäki Zäynullin, Ayrat Ğabdullin, Räfis Kaşapov, Lälä Dautovalar.

Qorıltay eşendä şulay uq, Mäskäwdän kilgän Natsional-bolşeviklar partiäse wäkile dä qatnaşqan. Matbuğat oçraşuında taratılğan qorıltay rezolyutsiälärenä qarağanda, oyıştıruçılarğa urıs natsional-bolşevigınıñ çığışı nıq oşağan.

Qorıltaynıñ başqa rezolyutsiälärenä kilgändä, anda Tatarstanğa möstäqillekne qaytaru, awıl tormışı, Tatarstanda Grajdannar Cämğiäte dip atalğan yaña oyışma tözü, respublikada tatar telen berdänber däwlät tele itü, urıs telenä millätara aralaşu tele statusın birü häm başqalar xaqında. Döres, bu cıyılışnı oyıştıruçılar, tatar telen berdänber däwlät tele itüne taläp itsälär dä, matbuğat oçraşuın urıs telendä alıp bardılar. Jurnalistlarğa taratılğan dokumentlar da urısça yazılğan ide.

Bu matbuğat oçraşuına, Azatlıq radiosı, Звезда Поволжья gäzite wäkilläre häm tağın ike jurnalist xanım kilgän ide.

Räfis Cämdixan

XS
SM
MD
LG