Accessibility links

Кайнар хәбәр

Kamal teatrı direktorı Şamil Zakirovqa 60 yäş


Ğaliäskär Kamal isemendäge tatar akademiä drama teatrında sişämbe könne 20 yıl buyı teatrnıñ alıştırğısız citäkçese bulıp xezmät itüçe Şamil Zakirovnı 60 yäşlek yubileyı belän täbrikläw kiçäse uzdı. Yubiley kiçäse teatrnıñ foyesında uq başlandı. Anda qunaq aşına äzerläp, öställärgä tämle rizıqlar quyılğan ide. Foat Äbübäkerov citäkçelegendäge teatr orkestrı Şamil Zakirovnıñ yaratqan, tatar xalıq köylären uynap tordı. Kiçädä Luara Şakircan, yubilyarnıñ ğömer yulı belän tanıştırdı. Ul uynağan spektakllärdän özeklärne Kamal teatrı artistları kürsätte. Yubilyarnı qotlarğa kilüçelär arasında bilgele sänğätkärlär Tatarstan däwlät şurası deputatları Räzil Wäliev, Tufan Miñnullin häm yaqtaşları, abruylı citäkçelär kilgän ide. Tatarstan Prezidentı Mintimer Şäymievneñ “räxmät xatı”n mädäniät ministrı urınbasarı Ayrat Cabbarov uqıp tapşırdı. Ätnä rayonı wäkilläreneñ yubilyarnı üzençälekle sürätläp qotlawların Ğömär Märdänov citkerde. Yubilyarnı Orenburg, Başqortstan teatrları wäkilläre dä qotladılar. Finlandiä tatarlarınıñ qotlawları tamaşaçığa ekranda kürsätelde. Olı canlı fidaqär şäxes Şamil Zakirovnıñ 60 yıllıq yubileyı zur milli bäyräm, icat sabantuyına äwerelde.

Mälikä Basıyr
XS
SM
MD
LG