Accessibility links

җомга, 9 декабрь 2016, Казан вакыты 14:48

Qazan üzägendäge elemtä bülegendä internetqa ayına 1meñ keşe totaşa




Tübän Novgorod Diniä näzäräte saytı (islam.nn.ru) bizäleşen üzgärtü turında xäbär itte. Ämma älegä haman da üzgärtmäde. Yañartılğan sayt, Nicğar tatarlarınıñ milli-mädäni avtonomiäse säxifäse belän bergä açılır dip uylanıla. Adresları äle xäbär itelmi, ämma saytnıñ çınnan da buluına islam.nn.ru säxifäsendä şiklänergä urın qaldırılmıy. Andağı milli-mädäni avtomiä bik aktiv eşçänlek alıp bara. Şul uq internet säxifä xäbär itkänçä, bu könnärdä älege tatar möxtäriäteneñ üz binası barlıqqa kilde. Ä Nicğar tatarlarınıñ xäzerge yäşäyeşe belän älegä www.islam.nn.ru säxifäsendä tanışıp barırğa bula.



Mäskäwdäge tatar yegetläre, tatar modası turında internet sayt yasap, cämäğätçelekkä täqdim itte. Andıy proyektnıñ äzerlänep kilüe turında xäbär itkän idek inde, xäzer saytnıñ tulılanıp, eşli başlawın kürergä bula. Adresı - tat.intermoda.info. İseme - «Fashion tatar», iñ tatar modası. Saytnıñ xucaları tatar modası turında yazarğa teläweçlärne xezmättäşlekkä çaqıra. Tatar modası turında mäqälälär bulmağan waqıtta, älege sayt dönya häm rusiä modası turında kübesençä yaza. www.tat.intermoda.info



Tatarstanda, İnternet öçen cawaplı ministrlıq barlıqqa kilde. Tögäl itep äytkändä, ul elek tä bar ide. İnternetnıñ üseşe belän Elemtä Ministrlığı şöğellände. Bu atnada Tatarstan deputatları, älege oyışmanıñ isemen Elemtä häm informatisatsiä Ministrlığı itep üzgärtte. Yaña ministrlıqnıñ nigezlämäse äle yuq, ämma, oyışmanıñ wäqälätläre kiñäyır, dip kötelä. Ministrlıq «Elektron xökümät» tözü, däwlät oyışmaların berdäm çeltärgä totaştıru belän şöğellänüne däwam itäçäk, dip xäbär itelä. İnternet häm tele-kommunikatsiälärneñ üseşe dä şul uq oyışma qarmağında bula. Ä menä däwlät mäğlümat çaraları, gäzit, jurnallar eşçänlege «Tatmedia» agentlığı cawaplığında qalaçaq ikän.



Qazanda xäzer, kafelarda, säwdä üzäklärendä, çäy häm tuñdırma belän bergä, internetqa kerep çığarğa da täqdim itelä. Şähär üzägendä urnaşqan kafelarda, internetqa totaşu, yartı säğäte - 50 sum tora. Qazannıñ ber zur säwdä üzägendä - 25 sum. Ä menä Elemtä büleklärendä urnaşqan, internetqa kollektiv totaşu urınnarında, internetnıñ 30 minutı 15 sum tora. Qazannıñ näq üzägendä, Tuqay mäydanında urnaşqan Elemtä bülegendä dä, global çeltärgä totaştırılğan 3 eş urını bar. Älege Elemtä bülege başlığı Nadıeva Lubov äytkänçä, ayına monda 1meñgä yaqın keşe kilä. Kübesençä studentlar bula, ämma ölkän yäştäge keşelär dä kilgäli, di Lubov xanım. Kompyuterda eşli belmägän keşelärgä, bülek xezmätkäre yärdäm itä ala. Mäsälän, ölkän yäştäge keşelärgä şulay elektron poçta tartmasın açıp birälär, çit illärdä yäşäwçe balaları belän internet aşa elemtägä kerergä, xat cibärergä, qabul itärgä yärdäm itälär. Elemtä bülege başlığı äytkänçä, internetqa totaşu urınnarı zur populyarlıq qazandı, anda keşe ber özelep tormıy. Ämma, eş urınnarın arttırırğa alarnıñ mömkinlek yuq, çönki ul waqıtta internet-salon zıyanğa eşli başlıy. Kompyuterlarnı tekstlar bastıru, skan itü, käräzgä çığaru öçen qullanu, zur tabış kitermi, ämma, andıy eşlärgä dä soraw zur xäzer, di Lubov Nadıeva. Soñğı yıllarda küpläp açılğan internet-kafelar, xäzerge waqıtta yabıla bara. Çönki kübese şul uq finans qıyınlıqlarğa oçrap, tabış kitermi başlıy.

Bikä Timerova.

XS
SM
MD
LG