Accessibility links

Кайнар хәбәр

Tatarstan morzaları tanıqlıq aldı


Tatar morzaları mäclese Qazanda ber yıl däwamında eşläp kilä. Şimbä könne Qazan milli-mädäni üzägendä morzalar üzlären barlaw, telne, ğöref-ğadätlärne saqlaw, däwlätçelekne buldıru mäs’älälären tikşerü maqsatınnan cıyıldılar. Bu könne zatlı toqım wäkillärenä tanıqlıq tapşırıldı. Rusiä tarixi arxivı häm boyar kitapları nigezendä gerol'diä komissiäse tatar bäkläre häm morzalarına 75 tanıqlıq tapşırdı.
Cıyılışta näseldän miras bulıp kilgän morzalıq xoquqına xalıq cırçısı Zilä Sönğatullina da iä buldı. Morzalıq şahädätnämәsenä komissiäneñ räise Ayrat morza Teregulov, gerol'dmeyster Renat morza Yenikeev häm gerol'diä särkätibe Ramil morza Çanışev bäk qul quyğan.
Bügen bu tanıqlıq simvolik ähämiätkä genä iä. Ä elek ul uqırğa kerü, belem aluda häm başqa küp kenä mäs'älälärdä östenleklär birgän, dip söyli tatar morzaları mäcleseneñ geral'diä komissiäse gerol'dmeysterı, çabatalı morza näsele wäkile, ataqlı kompozitor Renat Yenikeev.
Bügen isä ğadi bay belän morza arasında bernindi ayırma yuq. Morza bulır öçen fäqät äti-änilärneñ aq söyäklär näselennän buluı kiräk. Şulay da Renat Yenikeev äytüençä, zatlı toqım wäkilläre ayırım sıyfatlarğa da iä bulırğa tieş. Üzäktäge sıyfat - böten yaqtan tärtiple bulu.
Şulay itep, şimbä könne Qazannıñ milli-mädäni üzägendä uzğan cıyılışta morzalarğa tanıqlıq tapşırıldı. Mondıy tanıqlıqnı kiläçäktä tağın ike yöz zatlı toqım wäkilenä tapşıru qaralğan.
Al'bina Zäynulla, Qazan.
XS
SM
MD
LG