Accessibility links

якшәмбе, 11 декабрь 2016, Казан вакыты 13:01

Strasburgta Çeçnyağa bağışlanğan tügäräk östäl söyläşüe uzdı


Biredä bügen Yevropa Şurası Çeçnyadağı wağziätkä bağışlanğan tügäräk östäl söyläşüen uzdırdı. Oçraşuda 40qa yaqın Rusiä häm Mäskäw yaqlı Çeçen säyäsätçeläre qatnaştı, alar arasında Çeçnya prezidentı Alu Alxanov ta bar ide. Prezident Alxanov, Çeçnyada keşe xoquqlarıñ bozıluın tanıy, xakimiätlär wazğiätne cayğa salır öçen quldan kilgänne eşli, dide ul. Xäzerge waqıtta Çeçnya xökümäte parlament saylawlarına äzerlek belän mäşğül: "...demokratik saylawlar uzdıru, Çeçen cämğiäteneñ barlıq wäkilläre qatnaşında tawış birüne uzdıru bezneñ öçen bik möhim," dide Alxanov. Strasburgta bügenge söyläşügä xökümättän bäysez oyışmalar, Yevropa Şurası wäkilläre häm xalıqara küzätüçelär çaqırılğan ide. Çeçnyanıñ elekke prezidentı, küptän tügel üterelgän Aslan Masxadovnıñ wäkilläre söyläşüdä qatnaşmadı. Yevropa Berlege wäkile Benita Ferrero-Valdner bügen Mäskäwdä, Çeçnyağa 11 april könne berlek wäkillärennän torğan törkem kitä, dip belderde. Alar anda Çeçnyanı tözekländerügä qatnaşu mömkinleklären tikşeräçäk. Ul arada New Yorkta urnaşqan keşe xoquqları oyışması Human Rights Watch, Yevropa Berlegen Rusiä xärbiläreneñ Çeçnyada keşe xoquqların bozuına küz yomuda, ber nindi dä çaralar kürmäwdä ğayepläde. Üzeneñ yaña xisabında Human Rights Watch, Rusiäneñ iminlek köçläre Çeçnyada "keşeçelekkä qarşı cinäyät qılunı däwam itä" dielgän.

XS
SM
MD
LG