Accessibility links

шимбә, 10 декабрь 2016, Казан вакыты 17:49

Semberdä Bolğar atamasına qaytu turında


Semberdä Bolğar atamasına qaytu temasına TNT, “2х2 İdeldä” kanalları “Bolğar yañarışı” isemle oyışma räise Şäwkät Bogdanov belän äñgämälär birdelär. RTR kanalı aşa “Çişmä” televizion programması da bezneñ bolğar babalarıbıznıñ varisları buluıbıznı raslawçı dokumentlar belän tanıştırdı. “Ömet” gäzitendä basılğan äñgämä oyışmanıñ barlıqqa kilüe ixtıäcı, anıñ eşçänlege, başqa töbäklär belän elemtäläre häm kiläçäkkä plan-niätläre belän tanıştırdı.

Bu aktivlıq “Bolğar yañarışı” oyışmasınıñ bulaçaq cıyılışına fikerdäşlär tuplaw maqsatınnan bulğan ikän. Çarada 70 – 80 çaması keşe qatnaştı. Älbättä, fikerdäşlär cıyılğaç, süz ber ük yunäleştä bardı inde: “Bez – bolğarlar!”.

Ä cirle şağirebez Rifqat Xismät isä bez bolğar ğına da, tatar ğına da tügel – bolğar-tatarlar digän temağa matur ğına şiğır täqdim itte.

Cıyılış kiläçäkkä xalıq arasında añlatu eşläre alıp baru ısulların bilgeläde häm Tatarstan xaqimiätenä respublikabıyzğa “Tatarstan-Bolğarstan” isemen birüne sorap xat yullarğa buldı. Cıyılışta başqa mäs''älälär dä qalqıp çıqtılar. “Tuğan tel” oyışmasınıñ berençe könnärennän ük aktiv äğzası bulğan İzilä xanım Wafina, xäläl cefete Midxät ağa märxüm bulğaç, tuğan awılında yäşi. Ul “Azatlıq” radiosı tapşıruların Qazan radiosı aşa tıñlaw mömkinlege yuğalaçağına tirän borçılu belderde. Awıl xalqında elektän saqlanıp qalğan ozın dulqınlı radioalgıyçlar ğına bar ikän. Xäzer qısqa dulqınlı priemnik kiräk. Ä alar ber cirdä dä satılmıylar. Dimäk, “Azatlıq”nı tıñlaw çarası qalmıy.

Asiä Möleqowa da üz borçılulıran belderde: Qazan üz tapşıruların da qısqartırğa mäcbür ikän, may ayında “Balqış” tapşıruı yabıla, di. Anıñ täqdime buyınça Tatarstan citäkçelegenä bu tapşırularnı saqlap qalu turında möräcäğät qabul ittelär. “Läkin Mäskäwneñ añlaşılmağan säyäsäte şartlarında Qazan nişli ala inde?” – diyuçelär dä buldı. Şulay da xat cibärü qıyın tügel iç – rizalaştılar. Ä Şäwkät Bogdanov äytüençä, “Tatarstan “Azatlıq”nı tıñlawğa qısqa dulqınlı radioalgıyçlar çığaru belän yärdäm itä ala. Çönki xäzer, nigäder, andıy priemniklarnı tabıp bulmıy. Şäwkät Mäskäwgä barırğa niäten beldergäç, berniçä keşe aña şundıy radioalgıyçlar alıp qaytuın soradılar. Mäskäwdä bulsa inde, älbättä.

“Azatlıq” radiosı, Ayrat İbrahim, Sember.

XS
SM
MD
LG