Accessibility links

дүшәмбе, 5 декабрь 2016, Казан вакыты 23:44

Başqortstanda 27 martta ütäçäk referendumğa äzerlek qıza bara


Respubliktağı oppozitsiä munisipäl berämleklär başlıqları urındağı xalıq tarafınnan saylanırğa tieş dip barsa, Başqortstan citäkçelege alarnı urındağı deputatlar aşa saylatırğa teli. Bu añlaşıla da – çönki urınnardağı deputatlar xaqimiät tözegän isemleklär buyınça “xalıq yalçıları” statusına iä bulalar häm, älbättä inde, östägelärneñ “ä” digänenä “cä” dip kenä utırırğa öyrängännär. Şulay itep, ägär 27 marttağı referendumda türälär üz maqsatlarına ireşsälär (ä monıñ şulay bulaçağına berkem dä şik beldermi, çönki respublik citäkçelege saylawlarda häm,xätta, xalıq sanın isäpkä alu çarasında üzläre telägän näticägä ireşü ısulların yaqşı üzläştergän), urınnardağı xaqimiät başlıqların “saylaw” moña xätle bulğan prezident uqazı belän bilgeläwdän ällä ni yıraq kitmäyäçäk.

Şunısı ğıybrätle – Ufa şähären häm respublik rayonnarın: “Elekkeçä yäşärgä telämibez! Referendumda qatnaşıp şunı äytik!”, “Sin iske xaqimiätne alıştıru yağındamı? Şulay bulsa – referendumda qatnaş häm “äye” dip cawap bir!” digän eçtälekle listovqalar basıp aldı. Türälärneñ urınnardağı xaqimiätne alıştırırğa çaqırğan mondıy frazeoloğiäse ber “qara” anekdotnı iskä töşerä: İkençe bötendönya suğışı çorı. Alman qonslağerında dinamiklar aşa iğlan yañğırıy: axtung, axtung! Bügen barığıznıñ da kerlängän postelläre almaştırıla. Cidençe baraq dürtençe, ä sigezençe baraq öçençe baraq belän almaşa.

İñ mäzäge – xalıqnı referendumda qatnaşırğa çaqırsalar da, referendumnıñ sorawı älegä qädär respubliknıñ räsmi gäzitlärendä basılğanı yuq. Respublik radiosı, telewideniäse dä anı yañğıratmıy. Yağni, respublik xalqınıñ absolyut küpçelege nindi soruğa cawap birergä kiräklegen dä belmi diärgä bula. Dimäk, bu referendumda qatnaşuçılarnıñ närsä öçen tawış birgännären tögäl genä belmiçä yäisä bötenläy belmiçä, ä “şulay tawış birergä quştılar” dip kenä, türälärneñ bu aqsiäsen xuplawları bik ixtimal.

Säyäsi ekspertlar fikerençä, bu referendumda üzeneñ “ciñüen” oyıştırıp Başqortstan citäkçelege kimendä ike quyannı beryülı atarğa teli.

Berençese – Mäskäwne BR prezidentı Mortaza Räximovnıñ respubliktağı xällärne tulısınça üz qulında tota dip ışandıru. Ni disäñ dä, Başqortstandağı soñğı prezident saylawları Räximovnıñ “qatı qul” imdjın şaqtıy şulpalattı.

İkençese - ägär inde Mortaza Räximovqa yaqın aralarda urınınnan kitärgä turı kilsä, Räximov “ğäiläse” respubliktağı xällärne kiläçäktä dä üzlärenä tuğrılıqlı cirle üzidärä başlıqları aşa qontrol'dä totarğa niätli.

XS
SM
MD
LG