Accessibility links

җомга, 9 декабрь 2016, Казан вакыты 03:04

Sverdlovski ölkäse gubernatorı Eduard Rossel Başqortstanda bulıp kitte


Anı “Ufa” aeroportında Başqortstannıñ iñ yuğarı däräcäle türäläre qarşı aldı. Rosselneñ kilüen Başqortstannıñ räsmi gäzitläre “duslıq”, “ut kürşe” h.b. şunıñ işe qupşı süzlär belän bilgelädelär. Äytkändäy, näq şundıy süzlär elegräk Tatarstan citäkçelärenä qarata äytelä ide. Ğomumän, Rosselneñ wizitı tiräsendä tudırılğan atmosfera, bu oçraşunıñ nindider iqtisadi doqumentlarğa qul quyu öçen genä tügellegenä işarä yasıy ide. Häm ul şulay bulıp çıqtı da.

Mäğlüm buluınça, Tatarstan prezidentı Mintimer Şäymievnıñ prezidentlıq wazifaların saluı turında Rusiä prezidentına ğärizä tottıruı, art sannarı türälek känäfienä berekkän qayber subyıqt başlıqların xafağa saldı. “Nowıy region” mäğlümat ağentlığınıñ 17 marttağı internet säxifäsendä äytelgänçä, Rusiädäge yänä öç töbäkneñ citäkçese üz urınında ozaq utırırğa ömetlänä - Mäskäw merı Yüriy Lujqov, Swerdlovsk ölkäse ğubernatorı Eduard Rossel häm Başqortstan prezidentı Mortaza Räximov. Alar öçese dä öçençe sroqta utıralar. “Nowıy region” ağentlığında raslanğança, Yüriy Lujqovnıñ problemnarı yuq – ul Putinğa yaraqlaşqan häm Rusiä başqalası belän näticäle idarä itä. Rosselneñ xälläre xörteräk dielä. Ä menä ütkän prezident saylawlarında kilep tuğan qatlawlıqları Räximovqa Putinnan türälekkä fatixa alırğa qomaçawlawı ixtimal. Şundıy uq fikerne “Arğumentı i faqtı” gäziteneñ 15 martta näşer qılınğan sanında Mäskäwdäge “Merqator” analıytiqa törkeme citäkçese Dmitriy Oreşkin da yañğırata. “Ğubernatorlarnı bilgeläwneñ yäşeren prujinaları” digän analıytik yazmasında ul Lujqov häm Şäymievqa Putin tiä almayaçaq, di. Ä menä Räximovnıñ yazmışı küplär öçen sabaq bulaçaq di ul. Anıñ fikerençä, Mäskäwdä dä, Qazanda da Kreml tayanırlıq qontrelitä yuq, ä menä Ufada bar. Rosselneñ yazmışı da Räximovnıqı kebek buluı ixtimal, dip isäpli Dmitriy Oreşkin.

Mondıy fikerlärneñ nigeze çınlap ta yuq tügel. Mortaza Räximovnıñ soñğı waqıtlarda eş qına: mine xalıq prezident itep 2008 yılğa xätle sayladı, min xalıq ixtıyarın xörmät itäm, şuña kürä 2008 yılğa qädär urınımda utıraçaqmın, dip täqrarlawı, älbättä, xafalanu bilgese bulıp tora. Mortaza Räximovnıñ “xalıq ixtıyarın xörmät itep” 2008 yılğa xätle prezident postında utırırğa tieşlege turında 15 martta matbuğat konferensiäsendä BR Däwlät cıyılışı Räise Qonstantin Tolqäçev ta belderergä kiräk dip taptı.

Ämma monıñ işe söylänülär torğan sayın nığraq äfsen uqunı xäterlätä. Çönki mondıy mäsäläneñ çişeleşe xäzer Mäskäw Kremlennän tora. Häm, älbättä inde, Tatarstan prezidentı Mintimer Şäymievnıñ ğärizä yazıp urınınnan kitüe häm Rusiä prezidentı ixtıyarı belän kire üz urınına qaytarılu protsessı başlanuı, BR prezidentın häm üzläreneñ kiläçägen bik ışanıçlı itep toymağan qayber başqa töbäk citäkçelären awır saylaw aldına quydı. Häm türälekkä Putinnan yarlıq aluğa bik ömetlänmägän andıy sub'yekt başlıqları Kremlgä urınnarınnan bolay ğına kitärgä cıyınmawları turında signallar cibärä başladılar – bezne xalıq sayladı, bez kitü turında ğärizä yazarğa cıyınmıybız h.b h.b.

17 martta BR prezidentı Mortaza Räximov häm Swerdlovsk ölkäse ğubernatorı Eduard Rossel Başqortstan jurnalistları belän oçraşuları waqıtında: “Sez Tatarstan prezidentı ürnägendä Rusiä prezidentınnan üz wäqälätläregezne ozaytunı sorap ğärizä yazarğa cıyınmıysızmı?”, - digän sorawğa berawızdan monı eşlärgä cıyınmawların belderdelär. Äytkändäy, Rosselne aşığıç räweştä Ufağa çaqırunıñ säbäbe dä (ä Eduard Rossel Ufadağı oçraşunıñ Başqortstan prezidentı initsiatiwası belän ütkärelüe turında belderde) Mäskäwgä bergäläp basım yasaw öçen bulğanğa oxşağan.

Älbättä, bezgä timägez dip, Mäskäwne ayırım-ayırım da kisätep bula. Ämma, bu pozitsiäne industriäl köçle ike töbäk başlığınıñ bergäläp yañğıratuı, Kremlgä köçleräk täesir itär, dip qaralğandır, möğayın. Annan soñ Räximovnıñ şul Rosseldän başqa añlaşırlıq fikerdäşe dä qalmağan bulsa kiräk. Üzenä iñ köçle arqadaş bulırlıq Tatarstan belän aralar soñ çikkä citkerelep, digändäy, bozılğan. Niçek kenä bulmasın – Başqortstan citäkçelegen yaqın aralarda zur sınawlar kötüe, xäzer inde säyäsätçelärdä şik tudırmıy. “Rossel” digän pistolettan atunıñ näticä birüe dä şikle, älbättä. Ämma, nişliseñ – yatıp qalğançı atıp qal, dilär bit.

Kärim Yauşev, Ufa.

XS
SM
MD
LG