Accessibility links

җомга, 9 декабрь 2016, Казан вакыты 13:02

Azerbaycan häm Tatarstan zıyaları Tuqay häm Sabirnı iskä aldı


Näwrüz bäyräme belän bergä, Tatarstanda yäşäwçe Azerbaycan milli-mädäni möxtäriäte üzençälekle çara ütkärde. Ul Näwrüz bäyrämenä, tatar şağire Ğabdulla Tuqay häm Azerbaycan şağire Sabir icatlarına bağışlandı. Älege kiçä «Bez monda kiçä genä kilmädek, azerbaycannar monda küptännän yäşi», digän süzlär belän başlanıp kitte. Bu xaqta Tatarstandağı azerbaycannarnıñ milli-mädäni avtonomiäse räise Admursal Monafov äytte. Anıñ süzlärençä, bu çara Rusiädä Azerbaycan yılın bilgeläp ütügä dä bağışlana. Älege oçraşuda Tatarstan häm Azebaycan milli zıyalıları wäkilläre oçraşıp, şiğerlären uqıdı, ike xalıqnıñ ruxi yaqınlığı häm duslığı turında çığış yasadı. Duslıqnıñ töp kürsätkeçe tatar şağire Ğabdulla Tuqay häm azerbaycan şağire Mirza Akbär Tahirzadä, ikençe törle äytkändä Sabir belän oçraşuı häm aralaşıp yäşäwe bulğan, dip sanala. Azerbaycan yazuçısı Xayäz Ğämit, ike şağir turında poema yazğan. Ul da älege oçraşuda bulıp, qärdäşlären häm kilgän qunaqlarnı üz telendä sälämäläde. Tatar yağınnan oçraşuda şağirlär Ğosman Sadä, yazuçı Raşat Safin , şağire Näcibä Safina häm başqalar da buldı. Tatar zıyalıları, barısı da añlasın dip, oçraşuda urısça söyläşte. Şağirä Näcibä Safina azerbaycan şağirläreneñ tatar uquçılarına yaqınraq buluğa teläge turında xäbär itte. Ber bersen tanıp belü öçen, tärcemä itü kiräk, Nacibä Safina da berniçä avtornıñ äsären tatarçağa äyländergän inde. Anıñ äytüençä, tatar şağire Äxmät Ğadel, azerbaycan şağire Xayäz Ğämitneñ poemasın tatarçağa tärcemä itkän. Xäzer «Tuqay- Sabir» digän poema belän tatar uquçıları da tanışa alaçaq. İke şağirneñ icatlarına bağışlanğan älege oçraşuda Näwrüzneñ kilüe dä iskä alındı. Azerbaycanda üskän yäşellek östälgä quyıldı, tatlı baqlawa, başqa azerbaycan täm-tomanrı östälgä quyıldı. Qunaqlarnıñ küñelen kütärer öçen, azerbaycan köyläre dä başqarıldı.

Bikä Timerova, Qazan.

XS
SM
MD
LG