Accessibility links

җомга, 9 декабрь 2016, Казан вакыты 18:25

BMO wäkile Gruziä-Abxaziä söyläşülären başlaw ixtimalına saq qına ömet belderä


Gruziä häm anıñ separatist öleşe bulğan Abxaziä citäkçeläre solıx söyläşülären yañartıp cibärergä cıyına, digän xäbärlär bar. BMO wäkile Jean-Marie Guehenno süzlärençä, taraflarnıñ ikese dä söyläşülärne iqtisad, qaçaqlar kebek ğämäli mäsälälärdän başlarğa teläk beldergän. Şul uq waqıtta Abxaziäneñ bäysezlek taläben yomşarıuna älegä işarälär yuq.

Uzğan ay Gruziä belän Abxaziädä söyläşülär ütkärep qaytqan BMOnıñ tınıçlıq saqlaw wäkile Jean-Marie Guehenno Gruziä belän Abxaziä arasında solıx söyläşülären yañartu ixtimalın "saq qına ömet" dip bäyäli. Härxäldä taraflarnıñ ikese dä kiläse ayda Jenevada ütäçäk söyläşülärgä wäkillär cibärergä kileşkän. Düşämbdä BMOnıñ İminlek Şurasında yabıq işeklär artında ütkän tıñlawlardan soñ Jean-Marie Guehenno Azatlıqqa ni öçen "saq qına ömet" süzlären qullanuın bolay añlattı:

Audio (Jean-Marie Guehenno)

"Taraflarnıñ ikesendä dä ğämäli mäsälälärne tikşerergä teläk bar: küçep kitergä mäcbür bulğan keşelär, iqtisad, iminlek mäsälälären. İkençe yaqtan, andıy teläk bulsa da, älegä taraflarnıñ nigez qaraşları ber-bersennän bik yıraq."

BMOnıñ Gruziädäge solıx eşçänlege uzğan yılnıñ cäyennän birle waq-töyäk eşlärdän ğibärät. Abxaziäneñ ozaqqa suzılğan bäxäsle prezident saylawları bu eşne bötenläy tuqtattı diärlek. Nixayät, ğinwar ayında, Sergei Bagapş ciñüçe dip iğlan itelde läkin Abxaz citäkçelegendä berdämlek äle dä yuq di Jean-Marie Guehenno:

Audio (Jean-Marie Guehenno)

"Minemçä, Bagapş Abxaz xalqına närsäder kürsätergä tırışa. Läkin bu bik çeterekle wazğiät. Şuña kürä min saq qına ömet dim. Körçektän soñ nindider xäräkät çatqıları kürenä, gärçä zurğa ömetlär yuq."

Berläşkän Millätlär Abxaz saylawların qanuni dip tanımadı. İminlek şurası Gruziäneñ bötenlegen ixtiram itüen äledän-äle qabatlap tora häm söyläşülärne dä "Abxaziä – Gruziäneñ ber öleşe" digän senariğa nigezlänep ütkärergä çaqıra. Üz näübätendä Bagapş töbäkneñ bäysezlek däğwasınnan waz kiçergä cıyınmıy.

Şuşı wazğiättä BMO räsmiläre hiçyuğı Abxaz räsmiläre berär ğämäli mäsälädän başlar digän ömet äytä. Misal öçen, torğan cirälären taşlap kitergä mäcbür bulğan görcilärne Gali täbägenä qaytaru mäsäläsennän.

Gruziäneñ Berläşkän Millätlärdäge wäkile Heidi Tagliavini Sergei Şambanıñ Abxaziäneñ tışqı eşlär ministrı itep bilgelänüen häm Jeneva söyläşülärenä wäkil itep cibärelüen uñay bäyäli:

Audio (Heidi Tagliavini)

NC032207 "Alar iqtisad mäsäläsendä eşlärgä, ışanıç qazanıp söyläşülär başlarğa äzer. Älege waqıt öçen, minemçä, bu bik yaxşı. "

Jeneva söyläşüläre Aprilneñ 7-8lärenä bilgelängän. Gruziä häm Abxaziä räsmilärennän tış anda Guehenno, Tagliavini häm dä Rusiä, Quşma Ştatlar, Britania, Fransiä häm Germaniä wäkilläre qatnaşır dip kötelä.

-Ali Gilmi
XS
SM
MD
LG