Accessibility links

Кайнар хәбәр

Omski möxtäriäte binasız qalmasmı


Yaña yıldan kommunal' xezmät kürsätü häm arenda bäyäläreneñ küpkä artuı säbäple Omski ölkä tatar milli-mädäni möxtariätenä binasız qalu qurqınıçı yanawı turında Azatlıq dulqınnarında beldergän idek. Möxtäriät citäkçelege uzğan şimbä könne bu mäsäläne tatar xalqı aldında quyıp anı çişü yulların ezläw maqsatı belän cıyılış ütkärde. Cıyılışnı möxtäriät räise Xaqim Sadıykov alıp bardı. Xalıqnı ul möxtariätneñ oyışu, älege binağa urnaşu tarixı häm kilep çıqqan problema belän tanıştırdı. Binasız qalğan oçraqta cıyılışırğa da urın bulmayaçaq häm möxtariätneñ eşçänlege tuqtaluı da ixtimal dip kisätte.

Äytergä kiräk cıyılışta cämğısı 53 keşe qatnaştı. Alarnıñ küpçelege ölkän yäştägelär ide. Tatar millätennän bulğan deputatlar, qayber wazıyfalı tatarlar, eşmäkärlär çaqırılğan bulsalar da, alarnıñ berse dä kürenmäde. Xakimiät dairälärennän berdänber qatnaşuçı - ölkä mädäniät ministrlığınıñ milli oyışmalar belän eşläwçe bülege belgeçe Nurbol Älcanov buldı. Xakim äfändeneñ alda quyğan bu sorawına tögäl genä cawap birüçe tabılmadı. Şulay da törle täqdimnär küp yañğıradı. Fond oyıştırırğa, eşne kommersiä yulına salırğa, tüläwle tügäräklär açarğa, sälämätlek saqlaw häm xoquq yaqlaw buyınça konsul'tatsiä üzäkläre buldırırğa, Tatarstan prezidentına möräcäğät itep problemanı citäkçelär däräcäsendä xäl itärgä digän häm başqa törle fikerlär küp buldı.

Cıyılış barışında tağın ber iğtibarğa layıq bulırday fiker yañğıradı, yäğni möxacätenä ayırım yort satıp alırğa digän täqdim buldı.

Arendağa bulmağan aqça, yort satıp alırğa qayan tabılsın dip bu täqdimgä artıq iğtibar birüçe bulmadı. Şulay da axır çiktä fond tözergä kiräk digän nıqlı qararğa kilende. Fondnıñ oyıştıruçısı häm cawaplı keşese itep bu fikerne täqdim itüçe Marat Katıyrov bilgelände. Marat äfändegä min fondnıñ eşläp kitäçägenä ışanıçığız barmı digän soraw yulladım. Marat äfände bu sorawğa, fond eşläp kitär, cıyılışta bulğan küp keşelär teläklären belderdelär, dip cawap birde

Äytergä kiräk, möxtariätneñ eşçänlegennän rizasızlıq belderüçelär dä buldı. Qayberäwlär möxtäriät 8 yıldan artıq xisap-saylaw cıyınnarı ütkärmi, xalıq belän bäyläneşe yuq, şuña kürä dä bügen artıq küp keşe cıyılmadı didelär. İkençeläre bezgä duslıq, berdämlek citeşmi dip assızıqladılar. Öçençeläre möxtäriät citäkçelären din ähelläre belän urtaq tel tabıp eşlämilär dip ğäyeplädelär.

3 säğättän artıq barğan qaynar fiker alışular binanıñ arenda bäyäsen ölkä byudjetı isäbennän tüläw mömkinlegen tabuların sorap ölkä häm şähär başlıqlarına möräcäğät qabul itü belän tämamlandı. Omski ölkä milli-mädäni möxtariäte binada qaluğa ireşä alırmı-yuqmı älegä äytüe qıyın.

Rozaliä Sayganova, Omski

XS
SM
MD
LG