Accessibility links

якшәмбе, 11 декабрь 2016, Казан вакыты 16:49

Qırğızstan xakimiate oppozitsiä çığışlarına qarşı qırısraq qaraş ala


Çärşämbedä Qırğızstan militsiäse Bişkäktä oppozitsiäneñ qarşılıq cıyının quıp tarattı häm berniçä distä keşene qulğa aldı, prezident Äskär Aqayev ilneñ eçke eşlär ministrın häm prokurorın eşennän aldı, ä premyer-ministr Nikolay Tanayev oppozitsiä wäkilläre belän oçraşu öçen ilneñ üzäk xökümätkä buysınuınnan çıqqan könyağına, Oş şähärenä barırğa äzer toruın belderde.

Qırğızstan xakimiate ilneñ könyağında cäyelgän xalıq kütäreleşeneñ başqalağa da taraluına qarşı qırıs çaralar küräse itte - çärşämbedä oppozitsiä tarafdarlarınıñ Bişkäktä oyıştırğan cıyını militsiä köçläre tarafınnan quıp taratıldı, anda qatnaşqan distälägän keşe qulğa alındı. Xakimiat totqarlawlar turında mäğlümat birmäsä dä, radiobıznıñ qırğız başqalasındağı xäbärçese, alar arasında yazuçılar, studentlar, oppozitsiädäge mäğlümat çaralarınıñ xezmätkärläre bar dip belderä. Yäşlärneñ "KelKel" xäräkäte citäkçese Alişer Mamasaliev militsiäneñ şul cıyınnı taratuı häm anda qatnaşuçılarnı totqarlaw turında menä nulär söyli, radiobız xäbärçese anıñ belän elemtägä, ul eçke eşlär bülegendä utırğanda kerä aldı.

Audio, Alişer Mamasaliev

"KelKel törkeme "Bez xaqiqatne belergä telibez!" digän isem astında ütkän bu cıyınnı oyıştıruçılarnıñ berse ide, anıñ barışında eçke eşlär ministrlığınıñ Bişkäk bülekçäse xezmätkärläre tupas räweştä köç qullanıp bezne avtobusqa utırttı häm Pervomay rayonı idaräsenä alıp kitte. Berkem berni añlatmadı, bezne nindi säbäplär arqasında totqarlawnı äytmäde" di oppozitsiädäge yäşlär xäräkäte citäkçese Alişer Mamasaliev. Anıñ süzlärenä qarağanda, cıyında xalıq xakimiattän, Cälälabad häm Oş şähärlärendäge xällär turında xaq mäğlümat taläp itkän bulğan. "Däwlät televideniäse häm xökümät qulındağı mäğlümat çaraları xäbärlärne beryaqlı ğına birä häm açıqtan-açıq yalğan söyli" di "KelKel" citäkçese.

Audio, Alişer Mamasaliev

Ul arada Qırğızstan premyer-ministrı Nikolay Tanayev oppozitsiä citäkçeläre belän oçraşu öçen Oş şähärenä barırğa riza buluın belderde, mäğlüm ki, Qırğızstannıñ könyağındağı şul qalada, kürşedäge Cälälabad, Qadamcay häm tönyaqtağı Talas wä Qoçqordağı tösle xakimiat binaları oppozitsiä köçläre tarafınnan yawlap alınğan ide. Ämma prezidentnıñ matbuğat wäkile Abdil Säğizbayev alay da, premyer-ministr könyaqta andıy bina yawlawçı "cinayätçel törkemnär" belän oçraşmayaçaq dip belderde. Premyer Tanayev Oşqa atnakiç kitä ala, ä çärşämbedä andağı oppozitsiä citäkçeläre belän Qırğızstannıñ saqlanu ministrı häm parlament citäkçese oçraştı digän xäbärlär alındı. Äskär Aqayev isä çärşämbedä, ildä xakimiatkä qarşı cıyınnar ütkärügä tieşle kirtälär quya almağannarı öçen Qırğızstannıñ eçke eşlär ministrın häm baş prokurornı eşennän aldı. Yaña ministr itep Bişkäk militsiäse başlığı Kiñäşbäk Düşäbayev bilgelände, belgeçlär anıñ şaqtıy qırıs citäkçe buluına işarä itä. Bişkäktän "Res Publica" basmasın näşer itüçe Zamirä Sidiqova:

Audio, Zamirä Sidiqova

Şuşı süzlärne raslap yaña eçke eşlär ministrı Düşebayev, ildä tärtip urnaştıru eşendä xökümät köç qullana ala dip kisätte.

Audio, Kiñäşbäk Düşäbayev

Anıñ süzlärençä, könyaqta xakimiat binaların yawlap aluçılar ber tügel, inde berniçä qanunnı bozuçı bulıp tora.

Kärim Kamal
XS
SM
MD
LG