Accessibility links

җомга, 9 декабрь 2016, Казан вакыты 07:04

Yekaterinburda tatar deputatları saylandı


Bu könnärdä Yekaterinburg şähäre dumasına saylawlar bulıp uzdı. 35 okrugqa bülengän zur, quätle şähär xalqı yaqındağı dürt yılda üz yazmışın xäl itüçelärne sayladı. Bu yılğı saylawlarnıñ tarixta kürelmägän ber üzençälege buldı: deputat isemen alu öçen köräşüçe öç yözgä yaqın kandidat arasında tuğız tatar keşese dä bar ide. Äytergä kiräk, şularnıñ altısı – bik layıqlı, millät ğorurlanırlıq yegetlärebez. Ägär dä alar dumağa ütä alsa, yöz meñgä yaqın tatar keşese yäşägän şähärdä tatarlarnıñ milli tormışın üsterüne professional yuğarılıqqa kütärü mömkin bulır ide. Şuña kürä dä, küp kenä ictimaği oyışmalar citäkçelärenä saylaw aldı kompaniäsendä ciñ sızğanıp eşläp alırğa turı kilde. Xäzer inde eşlängän eşneñ näticäse dä bilgele buldı. Şähär tarixında berençe tapqır töp idärä orğanında dürt tatar keşese eşläyäçäk. Dürtese dä köçle eşmäkärlär. İkese moña qädär tatar milli tormışına azmı-küpme yärdäm itep torğan keşelär. Qızğanıç, millät öçen canı-täne belän tırışıp yörüçe millätpärwär yegetlärebez ütä almadı. Şuña qaramastan, Sverdlov ölkä zakonnar cıyılışınıñ wäkillär palatası deputatı Al'bert Abzalov fikerençä, yaulanılğan qazanışnı millät üseşe faydasına qullanırğa mömkinçelek tabılır. Tatar deputatlar eşli başlasın äle

Näwrüz kebek onıtılıp barğan bäyräm yolaları Ural cirendä monnan berniçä yıl elek yañartıla başlağan ide. Bu yıl da, Yekaterinburg şähärendä eşläp kilüçe Milli Media-Xolding citäkçeläre tırışlığı belän, şähärneñ Ximmaş dip atalğan yıraq bistäsendä Näwrüz bäyräme oyıştırıldı. Yaz bäyräme, qoyaş bäyräme bularaq, martnıñ yämle könendä anı uramda ütkärergä buldılar. Näwrüz qunaqları itep Sverdlov ölkäseneñ Bulanaş şaxterlar poselogınnan “Tañ yoldızı” isemle tatar fol'klor cır ansamble çaqırılğan ide. Ansambldä qatnaşuçı apalar buş kilmägän: üzläre belän küp itep peşerep çäk-çäk, öçpoçmaq, göbädiä, qazan qabartması, qoş tele kebek milli rizıqlar alıp kilgännär. Ber çiläk su sıyışlı kümer samawırın da onıtmağannar. Çigelgän eskäterlär yabıp tabın äzerläp, qaynar samawırın gel yañartıp torıp, matur cırlar, taqmaqlar, iyüllär belän bar xalıqnıñ iğtibarın üzlärenä cälep ittelär. Küz açıp yomğançı Näwrüz mäydanına xalıq cıyıldı. Qalfaqlar kigän, çuqlı şällär bäylägän köläç yözle apalar kilgän keşelärne milli rizıqlardan awız itterdelär, qaynar çäy belän sıyladılar. Annan soñ kitte biyu, kitte cır! Şulay itep, qoyaş bäyräme bar xalıq bäyrämenä äwerelde. Näwrüz bäyräme bu yıl şulay üzençälekle bulıp uzdı.

Fäwiä Safiullina, Yekaterinburg

XS
SM
MD
LG