Accessibility links

шимбә, 10 декабрь 2016, Казан вакыты 19:36

Röstäm Latıypov häm Johann Sebastian Bach


21-26 martta Qazan däwlät konservatoriäsendä İdel buyı töbökläre arasında uzdırılğan bik üzençälekle konkurs bara. Röstäm Latıypov isemendäge bu konkurs böyek kompozitor Johann Sebastian Bachnıñ tuğan könenä bağışlana. Skripka, alt, violonçel klasslarında barğan bäygeneñ jüri isemlegendä Mäskäw tatarı Mäskäw däwlät Konservatoriäse professorı Zarius Şixmurzaeva da bar. Konkurs barışında Tatarstannan häm başqa töböklärdän törle uqu yortlarınnan kilgän yäş muzıkantlar fortepiano skripka, alt häm violonçel kebek muzıka qorallarında tik ike kompozitornıñ ğına äsärlären uynıylar. Konkursnıñ 1-2 turlarında tatar kompozitorı, dirijer, kürenekle cämäğät eşleklese Mäsğüt Latıypovnıñ äsärläre dä uynalsa, 3 turda tik Johann Sebastian Bachnıñ äsärläre uynala. Ä xäzer Johann Sebastian Bachnıñ “İtalian kotsertın” Permnän kilgän yäş muzıkant başqaruında tıñlağız.

Radio tıñlawçılarda “niçek inde böyek Bach belän tatar kompozitorı Mäsğüt Latıypov yänäşä quyıla?”,- digän soraw tuar. Bu sorawğa cawapnı Qazan däwlät konservatoriäseneñ fortepiano bülege professorı, jüri äğzası Älfiä Burnaşeva menä niçek cawap birde:

Audio

Bu keçkenä konkurs Tatarstannıñ konsertlı muzıkal tormışında ence börtege bulıp tora”,- dide Älfiä Burnaşeva -. Dimäk, bu konkursnı uzdıruda matdi yärdäm kürsätüçe, kürenekle kompozitor, dirijer, cämäğät eşleklese Mäsğüt Latıypovnıñ ulı - sänğätne yaqlawçı bay keşe, metsenat, Röstäm Latıypov. Ul üze turında söylärgä yaratmıy, bik tıynaq keşe. Häm anıñ tağın tatarlarğa bik tä faydalı yärdäme bar - ul 1994 yılda Qazanda Muzıkal nota näşriätı buldırğan. Häm anıñ tormış iptäşe Razia xanım Yenikeeva Qazan konservatoriäsendä fortepiano klassında dotsent bulıp 25 yıl uqıtqannan soñ näşriät eşläre belän şöğellänä başlıy. Küp kenä tatar kompozitorlarınıñ häm muzıkal citäkçelärneñ balalar öçen yazğan köylärennän cıyıntıq tözep berniçä kitap çığarğan. Şul kitaplar arasında “Tatar xalqınıñ 100 cırı”, “Näwrüz kilä”, - digän kitaplar da bar. “Min üzebezneñ milli äsärlärdän tözelgän cıyıntıqlar çığarırğa tırışam. Çönki balalarnı yäştän ük milli muzıka yärdämendä tärbiäläw bik zarur ”,-dide ul. Tizdän tağın ber cıyıntığı dönya kürergä tora, ansı “130 tatar xalıq köye”,- dip atalaçaq. Ul bu kitaplarnı Qazannıñ 1000 yıllığına kilgän qunaqlarğa taratırğa cıyına.

Röstäm Latıypov isemendäge häm anıñ xisabına ütkärelgän konkurs bıyıl inde 8nçe tapqır oyıştırılğan.

Mälikä Basıyr

XS
SM
MD
LG