Accessibility links

якшәмбе, 4 декабрь 2016, Казан вакыты 13:17

Yekaterinburda Niaz Dautov istälegenä kiçä


Küptän tügel Yekaterinburg şähäreneñ akterlar yortında ataqlı sänğät ostası, mäşhür cırçı, Rusiäneñ xalıq artistı, professor Niaz Dautovnıñ tuuına 90 yıl tuluğa bağışlanğan xäter kiçäse uzdırıldı. Kiçä Mäcit Ğafuri isemendäge tatar-başqort mädäniät cämğiäte räise Söfxät ağa Nadıyrov başlanğıçı belän, Sverdlovski däwlät opera häm balet akademiä teatrı, Ural däwlät konservatoriäse qatnaşında oyıştırıldı.

İke yöz keşe sıyarlıq zalğa kürenekle mädäniät eşlekleläre, Niäz äfände Dautovnıñ xezmättäşläre, tanışları, anıñ icatına baş iyuçelär, häm, ğomumän, opera sänğäten söyuçelär cıyılğan ide. Foyeda cırçınıñ tormış häm icat yulın surätlägän fotolar, anıñ Qazan, Mäskäw, Çiläbe, Yekaterinburg säxnälärendä çığış yasağan waqıttağı zur afişaları, yazmaları yazılğan plastinkalar, audio tasmalardan torğan zur kürgäzmä dä oyıştırıldı. Xäter kiçäsen Rusiäneñ atqazanğan mädäniät eşleklese Natalia Vilner alıp bardı.

Niaz äfände Dautov Yekaterinburg opera säxnäsendä 18 yıl eşlägän keşe. Ul ğına da tügel, Sverdlov kinostudiäseneñ berençe cimeşe bulğan “Silva” kartinasında töp rolne başqarunı da zamanında näq menä aña ışanıp tapşırğannar. Ğomumän, mäşhür millättäşebez Uralda zur sänğätne üsterüdä üzennän bik zur öleş kertkän. Şuña kürä dä anıñ iseme küñellärdä, tellärdä.

Natalia Vilner kiçä barışında kürenekle sänğät ostasınıñ tormış häm icat yulın bik matur, ütemle itep surätläde. Şunda uq Sverdlovski däwlät opera häm balet teatrı artistları çığış yasadı. Alar tıñlawçılarğa Niaz Dautov repertuarınnan cırlar citkerdelär. Tamaşaçılar Ural däwlät konservatoriäse studentı Dilizä Nadıyrovanıñ kürenekle tatar kompozitorları köylären başqaruın da bik yaratıp qabul ittelär.

Cıyılğan xalıq kiçäne oyıştıruçılarğa, bigräk tä mäşhür yaqtaşlarıbız isemen onıttırmıyça, äledän-äle şundıy mädäni kiçälär oyıştırıp toruçı, tınğı belmäs Söfxät ağa Nadıyrovqa olı räxmätlär belderde.

XS
SM
MD
LG