Accessibility links

җомга, 9 декабрь 2016, Казан вакыты 18:27

Yaña şiğerlär cıyıntığı


Bu könnärdä Yekaterinburg şähärendä yäşäp icat itüçe şağir Xafiz Ğälievnıñ “Xislär çişmäse” isemle yaña şiğerlär cıyıntığı dönya kürde. Sverdlov ölkäse, Krasnoufim rayonınıñ Urta Boğalış awılında tuıp üskän Xafiz Gәliev üzeneñ millätpärwärlege belän ayırılıp torğan millättäşebez. Anıñ “Ğäziz xalqıma”, “Tuğan tel”, “Yalğışmıyq” kebek şiğerläre tuğan xalqı, anıñ böyeklege belän ğorurlanu, anıñ yazmışı öçen borçılu xisläre belän suğarılğan. Şul şiğer yullarınnan berniçä genä özek kiterep ütäse kilä:

Törle yaqqa sibelsäk tä, Ruxıbız bezneñ berdäm. Bezne hiçkem ayıralmas Söyekle tuğan teldän! Mäñge yäşä, ğäziz xalqım, Ğasırlar aşa atla, Uñğanlığıñ belän dan tot, Tatarlığıñnı saqla!

Tağın berniçä yul:

Babalarnıñ ämanäte bulıp Qaldırılğan bezgä telebez, Nik qaysıbız üz irkebez belän Waz kiçärgä annan telibez? ...Täre taqqan ilbasarlar kilep Taptağanda tatar cirlären Dine, tele, tuğan ile öçen Şähit bulğan tatar irläre!

Xafiz Ğälievnıñ tuğan cir turındağı qayber şiğerlärenä İldus Mikagilov, İlgiz Safiullin kebek Uralda yäşäp icat itüçe millättäşlärebez köylär dä yazğannar. Bu cırlarnı Ural tatarları yaratıp cırlıy.

Cıyıntıqta şulay uq tuğrı duslarğa bağışlanğan, mäxäbbät xisläre belän dörlägän, ayırılu, bäxilläşü xisläre belän açı sağışqa mançılğan şiğerlär küp. “Xislär çişmäse” digän iseme cisemenä turı kilä kitapnıñ.

Xafiz äfände Galiev kitapnı çığaruda bulışqan, Milli Media-Xoldingnı ğämälgä quyuçılarnıñ berse, Sverdlov ölkä Zakonnar cıyılışınıñ wäkillär palatası deputatı, yaqtaşı Al''bert äfände Afzalovqa olı räxmätlären belderä.

XS
SM
MD
LG