İjawda tatar gimnaziäseneñ kiläçäge tikşerelde

Bıyıl İjawdağı tatar gimnaziäsendä berençe çığarılış. Çärşämbedä gimnaziä uqıtuçıları, çığarılış sıynıf uquçıları, ictimaği oyışmalar wäkilläre balalarnıñ kiläçäge turında fiker alıştı. Gimnaziä açılğanda tatar milli zıyalıların tärbiäläw maqsatı quyılğan ide. Şuña da çığarılış sıynıfı uquçılarınıñ nindi uqu yortlarında belem alırğa teläkläre belän qızıqsındılar. Alarğa milli yunäleştä uquların däwam itü öçen mömkinleklär tudıru turında suz alıp barıldı. Bu oçraşunıñ ikençe öleşe gimnaziä uqıtuçılarınıñ kiñäşmäse buldı. Ul «Milli belem birüneñ kiläçäge häm tatar xalqınıñ ğöref-ğadätlären, milli üzençälegen saqlap qalu, telne üsterüdä yaña yullar ezläw» dip ataldı. Kiñäşmädä şulay uq respublikanıñ mäğärif ministıyrlıygınnan belgeçlär, tatar milli oyışmaları äğzaları da qatnaştı. Uqıtuçılar belderüençä, älegä uqıtu planında qaralğan regional'' milli komponent programması tulısınça ütälmi. Bügen törle säbäplär arqasında, gimnaziä tatar tele uqıtuçıları belän dä tieşle külämdä tuplanmağan. Gimnaziädä milli eşlärne alıp baru öçen direktornıñ yärdämçese bulırğa tieş digän fiker dä yañğıradı. Şul uq waqıtta ana tele däresläreneñ möhimlegen kütärü, därestän tış eşlärneñ küp öleşe tatar telendä alıp barılırğa tieşlegenä basım yasaldı. Milli üzañnı üsterü eşe balalar arasında ğına tügel, ata—analar öçen dä bik kiräkle dip, alar öçen gimnaziädä maxsus tatar tele kursları açarğa, lektoriälär oyıştırırğa täqdim itelde. Bu eşne kiçektermästän başlarğa söyläşenelde. Soñğı yılda mäğärif sistemasın üzgärtü turında bik küp fikerlär yañğırıy. Bigräk tä milli mäktäplärne optimizatsiäläşterü bara, alarda uquçılar sanı az, ämmä tä''min itü küp finans talap itä dip yabu oçraqları bar. Şuña da gimnaziäneñ direktorı Gölzirä Äxmätşina bügenge burıçıbız gimnaziäne saqlap qalu dip basım yasadı. Gimnaziäneñ problemaları turında bez, xörmätle tıñlawçılar, sezne xäbärlärebezdä tanıştırıp torabız. Monda uqıtu eşen tağın da kiñräk cäyelderü öçen — urın yuq. Gimnaziä ütkän ğasırnıñ utızınçı yıllarında tözelgän binada urnaşqan. Äle haman aña yanqorma tözü mäs’äläse dä xäl itelmäde.

Xämidä Ğayfullina, Udmurtiä