Accessibility links

пәнҗешәмбе, 8 декабрь 2016, Казан вакыты 05:19

Qırğızstanda xakimiatne häm cämäğät tärtiben totrıqlandıru tırışlıqları yasala


Ber kön eçendä oppozitsiädän xakimiatkä küçkän säyäsi köçlär Qırğızstanda yaña idarä buınnarın qoru eşen alıp bara. İldä yaña premyer-ministr häm waqıtlıça prezident wazifaların ütäwçe bilgelände, xökümätneñ yaña äğzaları raslandı. Alarnıñ töp burıçı bulıp xäzer başqala Bişkäktäge tärtipne torğızu tora - comğağa qarşı tön anda kibetlärne talaw belän ütte, distädän artıq keşe üterelde.

Qayberäwlär "lälä inqilabı" digän isem birgän xalıq kütäreleşeneñ tuzanı Bişkäktä inde beraz utıra töşte häm xäzer ilneñ yaña xakimiate säyäsi totrıqlılıqnı, bigräk tä cämäğät tärtiben kire urnaştırırğa tırışa. Qırğızstanda xakimiat buşlığın buldırmaw ölkäsendä yaña citäkçelär şaqtıy citez eş itä - comğağa qarşı töndä Qırğızstannıñ Yuğarı Mäxkämäse 27-nçe fivral häm 13-nçe martta uzğan parlament saylawlarınıñ näticälären ğämäldän çığardı, mäğlüm bulğança, ildäge kütäreleş şul saylawlarda Aqayev yağınıñ, oppozitsiä süzlärenä qarağanda, tupas xärämläşülärgä baruı säbäple başlanıp kitkän ide. Şunda uq Bişkäktä elekke parlamenttağı ike palatanıñ da aşığıç utırışı uzdırıldı, tübän palata parlamentnıñ citäkçese itep İşenbay Qadıyrbekovnı sayladı, ä yuğarısı premyer-ministr itep oppozitsiäneñ kürenekle başlıqlarınnan berse Qormanbäk Baqıyevnı premyer-ministr itep bilgeläde. Konstitutsiädä prezident yuqlığında anıñ wazifaların xökümät başlığı başqara dielä, şuña kürä Baqıyev xäzer waqıtlı prezident ta bulıp tora. Ul ilneñ yaña xökümäten qoru belän mäşğül, anda inde elek oppozitsiädä torğan ähellärne kürep bula. Tışqı eşlär ministrı itep yänä Roza Otunbayeva quyıldı häm comğa könne ul, Baqıyevneñ elegräk, Qırğızstanda yaña prezident tağın öç aydan soñ saylanaçaq digän süzlären rasladı. Ä inde Äskär Aqayevqa kilgändä, anıñ tögäl qayda buluı haman da bilgele tügel, töştän soñ barı tik anıñ üz prezidentlığınnan waz kiçmäwe häm ildän waqıtlıça ğına kitep toruı turındağı belderüe dönya kürde. Bu yaña xakimiat öçen zur ber xoquqi kirtä tudıra ala - Aqayev üz wazifasınnan kitmi torıp yaña qırğız xakimiateneñ qanuni nigeze bik totrıqlı bulmayaçaq. Bu xaqta radiobızğa ilneñ Konstitutsiä Mäxkämäse xäkime Marat Qaipov belderde:

Audio, Marat Qaipov

"Ni qızğanıç, prezidentıbız ilne üz urınınnan kitüe xaqında beldermi taşlap kitte, häm bu qanuni problema tudıra. Berençe bulıp bez prezident yazmışın xäl itärgä tieşbez. Ul inde kitüe xaqında belderde digän xäbärlär bar ide, başqalar bu döres tügel di. Şuşı mäs''älä berniçä kön eçendä xäl itelergä tieş. Oppozitsiä wäkilläreneñ Aqayevqa iminlek tä''min itü ölkäsendä anıñ belän kileşüe kiräk. Bez ilne citäkçesez qaldıra almıybız" di Qırğızstannıñ Konstitutsiä Mäxkämäse xäkime Marat Qaipov. Ul üze ixtimal çişeleş bularaq Aqayevnı urınınan parlament tarafınnan alunı täqdim itä:

Audio, Marat Qaipov

"Prezidentı urınınnan alu tärtibe bar, monı kön tärtibenä quyu deputatlarnıñ küpçelegennän tora" di Qaipov. Yaña xakimiat öçen tağın qatlawlıraq burıç bulıp Bişkäktä mömkin qädär tizräk cämäğät tärtiben torğızu tora. Comğağa qarşı tön anda kibetlärne talaw belän ütte, bu şul xätle kiñ qolaç aldı ki, qüwät köçläre eşen yañartu öçen maxsus bilgelängän Feliks Kulov Bişkäk xalqına möräcäğät belän çığarğa buldı:

Audio, Feliks Kulov

"Minem bar ömetem xalıqqa ğına, totrıqlılıq, tärtip, namusıbıznı saqlap qalu maqsatında min sezne torğan urınnarığızda xalıq drujinalarına yazılırğa öndim" di Qırğızstannıñ qüwät xezmätlären citäklägän Feliks Kulov. Ul eçke eşlär büleklärendä xezmät itüçelärgä dä möräcäğät itep, alarnı kire eşlärenä qaytuğa çaqırdı häm şuşı taläp ütälmäsä alarnı militsiädän quu belän kisätte.

Kärim Kamal
XS
SM
MD
LG