Accessibility links

Кайнар хәбәр

"İslam İnfo" – urıs telle yaña dini gäzit


Qazanda İslam info isemle gäzit çığa başladı. Anıñ berençe sanı 3 meñ tiraj belän sişämbe könne genä dönya kürde. Başqa islamı gäzitlärdän ayırmalı bularaq, İslam-info närsäse belän ayırılıp torır häm matbuğat dönyasında üzeneñ daimi urının ala alırmı?

Çınlap ta, soñğı yıllarda islam temasın yaqtırtqan gäzitlär künnän-kön kübäyä bara. Tatarstanda inde distälägän, räsmi dini oyışmalar da çığarğan da, ayırım cämğiätlär näşer itkän dä gäzitlär şaqtıy. Älbättä, iñ ozın ğömerle gäzit ul, İman näşriäte tarafınnan çığarıla torğan İman gäzite buldı. 1991 yıldan birle çığıp kilä. Monnan tış, Tatarstan diniä näzaräteneñ dä berniçä räsmi basması bar. Ayırım gäzitlär dä çığa. Mäsälän, Ässaläm gäzite şundıylardan. Ä sişämbedä genä dönya kürgän gäzit İslam-info dip atalğan yaña gäzit urıs telendä häm ul Qazandağı Söläyman mäçete tarafınnan näşer itelä. Ğädäti, qulğa totıp uqırğa caylı formatta, 12 bitle bulıp basılğan gäzitneñ berençe sanında, nigezdä urıs telendä yazmalar urın alğan, läkin, gäzitneñ näşire, Söläyman mäçete imamı İldar xäzrät Bayyazitov süzlärenä qarağanda, kiläçäktä basma ike tellegä äylänäçäk.

Gäzit ber-ike san çıqqannan soñ, tatarça da basıla başlıy. Älegä tatar telendä yazuçı jurnalistlarnı ezlibez

Gäzitneñ berençe sanı eçtälegenä kilgändä, ul Qazandağı suqırlar öçen açılğan islam dine kursları xaqındağı yazma belän açıla. Monnan tış, basmada, Tatarstan möselmannarı möftie urınbasarı Wäliulla Yağqub belän, Tatarstandağı islam iseme astında barlıqqa kilgän sektalar xaqında äñgämä birelä. Anda süz räsmi islamnıñ zur ğauğalar quzğatqan Xizbut –tahrir oyışmasına mönäsäbäte kürsätelä. Gäzittä şulay uq, ike xoquq belgeçe sorawlarğa cawap birgän. Berse, dönyawi yurist, ikençese islam xoquqı belgeçe. Monnan başqa , gäzittä şaqtıy qızıqlı yazmalar urın alğan. Eçtälegenä qarağanda , gäzit, küpyaqlı bulırğa tora. Ä ildar xäzrät, gäzitneñ möxärrire bu xaqta bolay di

Bezneñ auditoriäbez yäşlär. Bez alarnı borçığan problemnarnı yaqtırtırğa tırışabız. Läkin bu äle olı yäştägelärgä dä qızıq bulmıy digän süz tügel, alar da üzlären qızıqsındırğan yazmalarnı taba alaçaq. Ä yäşlär kübräk urısça söyläşä, şuña kürä urısça çığardıq

Älbättä, Tatarstandağı dini basmalar arasında İslam info gäzite üz urının alır. Östäwenä, gäzit näşirläre, anı mäxällä gäzite dip kenä bilgeläsälär dä, ul yünäleşe buyınça küp törle ölkälärne yaqtırtırğa tora.

Gäzitneñ berençe sanı urıs telendä buluı, soñğı yıllarda dini dairälärdä yış kütärelä torğan mä’säläne tağın ber qat raslıy. Rusiädä islam urıs tellegä äylänä bara. Tik, İldar xäzrätneñ süzlärenä qarağanda, gäzit tatarça da çığa başlar häm tatar telle, yaña buın möselmannarın da yazmaları belän quandıru maqsatı quyıla.

Räfis Cämdixan

XS
SM
MD
LG