Accessibility links

дүшәмбе, 5 декабрь 2016, Казан вакыты 15:35

Qazan deputatları Mer bilgesen buldırdı




30nçe mart könne Qazan şähär deputatları cıyılışı ütte. Kön tärtibenä 20dän artıq mäs’älä kertelde. Alar arasında xalıq deputatları şurası utırışı Qazannıñ 1000yılığan äzerlänü barışı häm başqa mäsälälärne qaraldı. Qazan şähär başlığınıñ maxsus bilgese häm Qazannıñ üzeneñ xörmät büläklären buldıru mäs’äläse, ayıruça qızıqsınu tudırdı. Qazan deputatları utırışına çığarılğan mäs’älälärneñ küplege säbäple, alarnı ike öleşkä bülep qararğa buldılar. Qazan xalıq deputatları şurası utırışı 14 aprel könne däwam iteläçäk. Ä çärşämbe könne bulğan cıyılışta, deputatlar, küp waqıtnı, Qazan bilgelären raslawğa birdelär. Qazan merınıñ maxsus bilgese dä deputatlar tarafına täqdim itelde. Ul geral’dik çılbır häm qazan tuğrası çağıldırğan bilgedän tora. Mer bilgese wazifağa kergändä, bäyräm çaralarında, qunaqlarnı qabul itkändä, başqa şähärlärgä barğanda qullanaçaq. Şunıñ belän bergä, Qazannıñ maxsus büläkläre – maqtaw häm xörmät bilgeläre dä raslandı. Alarnı xakimiätlär şähär üseşenä zur öleş kertkän keşelärgä birergä täqdim itä. İnde bulğan maqtaw häm xörmät bilgelärenä, Qazannıñ maqtawlı grajdaninı, Qazannıñ xörmät kitabına kertü, Maqtaw gramotasın tapşıru, xezmät häm batırlıq öçen, namuslı eş öçen maqtaw bilgese, mer räxmäte, rayon häm oyışmalarnıñ maqtaw gramotaları kilep quşıldı. Deputatlar büläklärneñ tışqı qıyafäten xuplap, tawış birde. Bilgelärdä milli çalımnar bar, şähär başlıqları bilgeläre qupılarğa oxşatıp eşlängän, maqtaw häm xörmät gramotalarında milli bizäklärne, Zilant, Qazan Kremle suräten dä kürep bula. Mer bilgesen Qazan rässamı Röstäm Nuretdiov yasağan.

Cıyılışta şulay uq Qazannıñ 1000 yıllığına äzerlek mäs’äläse dä qaraldı. Bu xaqta maxsus doklad uqıldı häm tänäfestä cawaplı keşelär, jurnalistlar sorawına cawap birde. Yaña wazifağa kergän Qazan arxitektura idäräse başlığı Mäwletov Ernest äfände, şähärneñ küreneşe bäyrämgä qädär rätkä keräçäk.Qazannıñ arxitektur üzneçälege saqlanır, dip ışandırdı ul. Qazan şähär başlığı da, Qazannıñ 1000 yıllıq bäyrämenä qädär tärtipkä kertelerme, äzerlänü planı ütäläme häm başqa sorawlarğa cawap birde. Ul, bez xäzer inde başlanğan proektlarnı tämamlarğa torabız, eşlärne eşläp beterü öçend dä küp aqça kiräk. Qazan şähär başlığı, 1000 yıllıqqa äzerlänü däwlät komissiäseneñ soñğı utırışı bik ömetle, buldı dip äytte. Kamil İsxaqov başqala yubileyına östämä aqça kilüenä zur ömetlär bağlıy. Läkin federal byudjettan aqçalar kilgänçe, byurokratik maşinanıñ eşläp beterüen kötärgä turı kiläçäk. Ämma, Kamil İsxaqov äytkänçä, monı arqasında totqarlıqlar bulmayaçaq, çönki Dönya Bankı $50 million birergä äzer.



Bikä Timerova.

XS
SM
MD
LG