Accessibility links

Äskär Aqayev: "Garantiälär birelsä, min prezidentlıqtan kitärgä äzer"


Uzğan atnadağı waqiğälärdän soñ Qırğızstannan kitkän häm sişämbedä nihayät qayda buluın beldergän Äskär Aqayev haman da üzeneñ prezident bulıp qaluın äytä. Berük waqıtta ul, ägär dä tieşle iminlek garantiäläre birelsä şuşı eşennän waz kiçä aluına da işarä itä. Aqayev çınnan da moña bara alamı häm ul oçraqta üze öçen nindi garantiälär teli?

Sişämbedä Äskär Aqayev tawışı başta Rusiäneñ "Exo Moskvı" radiosında yañğırap, soñraq isä ul üze Berençe telekanalda kürende. Ämma anıñ şuşı ike mäğlümat çarasında yañğırağan fikerläre ber-bersennän beraz ayırıla ide. "Exo Moskvı"ğa Aqayev qatği töstä, üzeneñ haman da Qırğızstan prezidentı bulıp qaluın häm şuşı urınınnan kitärgä cıyınmawın belderde:

Audio, Äskär Aqayev

"Min älegä prezident urınnınnan kitmädem, şuña kürä dä min üzemne berdänber qanuni, saylanğan prezident dip isäplim häm älegä moñardan waz kiçü öçen säbäp kürmim" di Äskär Aqayev "Exo Moskvı" radiosına. Üzennän qala qanuni xakimiat itep ul Qırğızstanda barı tik yaña ğına saylanğan parlamentnı kürä, ä waqıtlı xökümätneñ bernindi dä qanuni wäkalätläre yuq dip belderä. Ä inde berniçä säğät soñraq Rusiäneñ Berençe kanalında kürsätelgän äñgämäsendä prezident Aqayev küpkä yomşağraq fikerlär äytte. Ul üzeneñ däwlät başlığı bulıp qaluın qabatlasa da, qayber şartlar ütälgän oçraqta eşennän kitä aluına işarä yasadı:

Audio, Äskär Aqayev

"Älbättä, ägär dä tieşle garantiälär birelep bu ğämäldäge qırğız qanunnarı nigezendä eşlänä ikän, min kitärgä äzer" di prezident Aqayev. Üzeneñ bu uñaydan nindi garantiälär teläwe xaqında ul berni dä äytmäde, läkin anıñ şuşı süzläre Bişkäktäge yaña xakimiatkä mäğnäle ber işarä bulıp tora. Waqıtlı xökümät qorğan oppozitsiä prezidentnıñ üz wazifasınnan kitüen bik teli, anda inde bolay da 26-nçı yüngä yaña prezidentnı saylawnı bilgeläp quydılar. Aqayev räsmi töstä kitmi torıp yaña prezidentnı saylaw bik ük qanuni bulmayaçaq. Şuña kürä dä anıñ yaña xakimiat belän säyäsi alış-bireştä pozitsiäse köçle. Aqayev prezidentlıqtan üze teläp kitä ikän, bu qırğız oppozitsiäseneñ qanunnı xörmät itüen kürsätkän ber ğämäl bulaçaq. Bişkäktäge yaña citäkçelär Äskär Aqayev prezidentlığınnan baş tartsa, aña tieşle garantiälär biräçägenä işarälär yasağan ide inde. Çärşämbedä monı, xakimiat almaşqannan birle Qırğızstannıñ qüwät köçläre eşen citäkläp kilgän Feliks Kulov ta qabatladı.

Audio, Feliks Kulov

"Prezident häm anıñ ğailäsenä garantiälär bireläçäk häm bernindi tikşerenü dä bulmayaçaq" dip belderä Kulov. Tik anıñ şuşı süzlärennän soñ Bişkäktän ikençe ber xäbär dä kilde - Feliks Kulov Qırğızstan parlamentında şul eşennän kitüen dä iğlan itkän. Mäskäwdäge Carnegie üzägendä eşläwçe, Üzäk Aziä belgeçe Aleksey Malaşenko fikerençä, Aqayev xäzer Qırğızstanda üzenä iminlek garantiäläre birerlek köçle ber citäkçeneñ kütärelüen kötäçäk häm säyäsi alış-bireşen anıñ belän alıp baraçaq.

Audio, Aleksey Malaşenko

"Bu satulaşu öçen qır şaqtıy kiñ, dip isäpli Malaşenko. "Ul, yäğni Aqayev urınınnan älegä kitmägän häm ikençe yaqta anıñ belän söyläşülär alıp barırlıq köçle citäkçe älegä yuq, qanuni yaqtan monı yaña parlament räise Tekebayev qına eşli ala, ämma çın xakimiat anda Kulov, Baqiev kebek, Aqayev qanuni sanamağan keşelär qulında." Bu Aleksey Malaşenko fikere ide. Belgeçlär, Qırğızstandağı keremle biznes elek Aqayevlar ğailäse qulında ide, satrulaşu da näq menä şunıñ tiräsendä barır dip farazlıy.

Kärim Kamal
XS
SM
MD
LG