Accessibility links

дүшәмбе, 5 декабрь 2016, Казан вакыты 11:35

Novosibirskida ölkä tatar mädäniät üzäge citäkçese Roza Tixomirovanıñ benefisı uzdı


Monnan 4 yıl elek citäkçe bulıp Roza Şamil' qızı Tixomirova bilgelängännän soñ, Novosibirski ölkä tatar mädäniät üzäge eşläreneñ küpkä alğa kitüe turında “Azatlıq” tıñlawçılarına citkergänebez bar inde. Roza xanım initsiativası belän oyışqan “Läysän” estrada törkeme Novosibirskida ğına tügel, kürşe-tirä töbäklärdä, Tatarstan häm Qazaxstan yaqlarında da tanılğan. Şunsı da iğtibarğa layıq, tatar mädäniät üzäge üzeneñ eşlären ölkä häm şähär xakimiätläre belän kileşep, urtaq tel tabıp alıp bara. Annan tış üzäk törle oyışmalar belän tığız bäyläneştä tora, ölkädä oyıştırılğan barlıq diärlek ğomum çaralarda, bäyrämnärdä qatnaşa, andıy çaralarnı yış qına üze dä oyıştıra. Şundıy bäyrämnärneñ qayberläre – näwrez, törki xalıqlarnıñ duslıq häm milli mädäniätlär festival'läre turında Azatlıq tıñlawçıları da xäbärdarlar.

Şuşı könnärdä genä Novosibirski ölkä tatar mädäniät üzäge tağın ber zur çara - Roza xanım Tixomirovanıñ benefisın, yäğni anıñ icat kiçäsen oyıştırdı. Kiçä ölkä däwlät filarmoniäseneñ konsertlar zalında ütte. Qatnaşuçılar häm qunaqlar anda Novosibirski ölkäseneñ awıl-rayonnarınnan ğına tügel, Tatarstannan, Anjero-Sudjenski, Tomski, Omski , Qazaxstannıñ Semey häm Qızıl-Orda şähärlärennän dä buldılar. Şunsı da iğtibarğa layıq, Roza xanımnı täbriklärgä küp kenä milli - rus, ukrain, qazax, äzerbaycan, qazaq häm başqa kollektivlar kilgän idelär. Täbrikläw süzendä härkem Roza xanım belän qulğa-qul totınıp eşläwe , tatar üzägeneñ ürnäk bulıp toruı xaqında belderde. Kollektivlar üzläreneñ milli cır-iyüllären dä büläk ittelär.

Kiçä barışında täbrikläwlär küp buldı. Ölkä häm şähär başlıqları isemnärennän räxmät xatları uqıldı, büläklär tapşırıldı. Ölkä xakimiäteneñ milli häm dini säyäsät , mädäniät idäräläre xezmätkärläre Roza xanım belän kileşep eşläwläre turında belderdelär. Şul uq waqıtta anıñ nıq ixtiarlı häm tälapçän buluın da assızıqlap üttelär. Novosibirskinıñ awıl-rayonnarınnan kilüçelär dä alar yäşägän rayonnarda tatar mädäniäten üsterüdä Roza xanımnıñ yärdäme küp buluına basım yasadılar. Başqa şähärlärdän kilüçelär dä Roza xanımnıñ eşçänlegenä yuğarı bäha birdelär.

Qazaxstan qunağı, Semi tatar sänğäte mäktäbe direktorı Gabdulxak äfände Axunjanov, forsattan faydalanıp, kiçädä qatnaşuçılarnı iyün ayında Semeydä utäçäk tatar sänğäte festivalenä çaqırdı.

Roza xanımnı Bötendönya tatar kongressı isemennän xäzer Qazanda icat itüçe yaqtaşı, cırçı Zaqir Şahban täbrikläde. Kongressnıñ Başqarma komitetınıñ räxmät xatın Roza xanımğa komitet äğzası - Mödäris Abakirov tapşırdı.

Kiçä barışında Novosibirski ölkäsendä tatar tormışınıñ stabil' buluına ayıruça basım yasaldı. Dörestän dä, bu totrıqlılıq tatar xäräkäte citäkçeseneñ nıq xarakterlı, köçle ixtiarlı buluına, xakimiät dairäläre aldında başqarılğan eşlärne kürsätä belüenä dä bäyleder. Roza xanımnıñ köçle ruxlı buluı bäyräm kiçendä dä kürelde: kiçä barışında ätiseneñ wafat buluı turında qayğılı xäbär işetkäç tä, sığılıp töşmäde, bäyrämne axırına qädär alıp barırğa köç taptı.

Bäyräm axırında Roza xanım qatnaşuçılarğa häm yärdäm itüçelärgä tirän räxmätlären citkerde. Anıñ yomğaqlaw cırın zal ayaq-ürä basıp tıñladı .

Saniä Mirxaleewa. Omski.

XS
SM
MD
LG