Accessibility links

Кайнар хәбәр

Britan mäxkämäse Mäskäwneñ tağı ber ekstraditsiä möräcäğäten kire qaqtı


Britan mäxkämäseneñ Russiäneñ Yukos belän bäyläneşle bularaq anıñ elekke ike cavaplısın ekstradiksiäläv taläben kire qağuı, London belän Mäskäv arasındağı mönäsäbätlärne kiskennäşteräçäk. Xakim Russiä xakmiätläreneñ Yukosnıñ elekke ölkän xezmätkärlärenä qarşı çaraları politik digän qararğa kilde.

Britan mätbuğatı prezident Putin ekstradiksiä qararları säbäple Britaniägä açulı digän xäbärlär belän tulı. Mäskäv elek tä Britan räsmilären Çeçen terroristlarına häm cinayätçelärgä sıyınu urnı birüdä ğäyeplägän ide. Mäskävneñ ekstradiksiä möräcäğäten kire qaqqan mäxkämä elegeräk Çeçen köräşçeläreneñ väkile Axmed Zakayevne häm oligarx Boris Berezovskiynı da Russiägä tapşırunı kire qaqqan ide. Bu märtäbä süz Yukosnıñ elekke xezmätkärlärennän ölkän buxalter Dmitrii Maruyev belän Natalia Çernışova turında bara. Alar miliardlağan dollar urlauda ğäyeplänälär. London Metropolitan Universitetınıñ xoquq belgeçe professor Bill Bowringnıñ süzlärneçä, Russiädä xoquq sistemasına tik Britan mäxkämäläre genä şiklänep qaramıy.

Audio

"Bu Russiä öçen bik uñaysız. Läkin, xakim Çernışova höm Maruyev mäsäläsendä qarar qabul itkändä, Keşe xoquqları buyınça Yevropa Mäxkämäseneñ uzğan yıldağı qararın küz aldında tottı. Oligarx Vladimer Gusinskiy Russiädäge qulğa alular häm törmädä totularnı şikayät itkän ide. Yevropa Mäxkämäse Gusinskiy xökümät belän kileşergä mäcbür itü motivı belän qulğa alındı häm totıldı digän qararğa kilgän ide."

Bowringnıñ belderüençä, Russiädä xakimnar basım astında toralar häm şul säbäple Russiä xakimiätlärenä Britaniädä justitsiäseneñ bäysez buluın qabul itü qıyın. London mäxkämäse xakimınıñ Yukosnı ezärlkeläv öçen kürsätmäne prezident Putin birde digän fikere dä möhim. Profesor Bowringnıñ süzlärençä,

Audio

"Britaniädä ekstradiksiä aktı bar. Şuşı aktqa esasän, mäxkämä ägär dä beräv eşälgän cinayäte öçen tügel, ä politik säbäplärdän tapşırıluı sorala ikän, monı kire qağa ala. Xakim Timothy Workman Russiäneñ başqa motivı bar , ul da bulsa ğäyeplänüçeneñ säyäsi qaraşları digän näticägä kilde."

Annan başqa deskriminatsiä qurqınıçı yäisä keşe xoquqları bozılu ixtimallığı bulğan oçraqlarda da ekstradiksiä taläbe kire qağıla ala. Yukosnıñ elekke xucası Xodorkovskiynıñ advokatları Britan mäxkämäse qararın xuplap qarşı aldılar häm bu Yukosnı ezärlkeläv öçen kürsätmäneñ Kremldän kilüen kürsätkän östämä dälil bulıp tora dip belderdelär. Russiä xakimiätläre Maruev belän Çernışevanı 1997-nçe yılda cirle xakimiätlärne ike miliard 600 milion dolarğa aldağan yalğan dokumentlar qullanuda häm şulay uq dävlätne aldau öçen Xodorlovskiy belän süz berläşterüdä ğäyeplädelär. Russiäneñ Britan mäxkämälärendä xäle ber dä ciñel. London King Kollegeda xoquq uqıtqan Jane Henderson, mondıy ekstradiksiä möräcäğätläre ciñel tügel digän fikerdä.

Audio

"Ägär dä Yevropa Berlege eçendä ekstradiksiä taläp itelä ikän, anıñ protesedurası başqaçaraq bula häm dälillär taläp itelmi . Läkin, taläp berlektä bulmağan ildän kilä ikän, törle dälillär sorala, bigeräktä ğäyeplänüçe qulğa alınmağan yäisä xökem itelmägän bulsa."

Niçek kenä bulmasın. Britan mäxkämäläreneñ Mäskävneñ ekstradiksiä taläplären kire qağıp kilüe ike il arasındağı mönäsäbätlärgä xezmät itmi.

Färit İdelle, Praga
XS
SM
MD
LG