Accessibility links

пәнҗешәмбе, 8 декабрь 2016, Казан вакыты 17:09

“Region” isemle ölkä fänni-tikşerü üzäge yäşlär arasında “taqırbaşlarğa” qarata mönäsäbät soraştırğan.


Mäktäplärneñ 11-sıynıf uquçıları alarnı çın patriotlar dip sanıy. Ä studentlar – agressiv säyäsät yaqlılar dip.

İkençe soraw alkaş, suqbay, narkoman, faxişälär turında. 14 – 17 yäşlelär – bik naçar mönäsäbättä, xätta törmägä utırtu kiräk dip tä sanıylar. Ölkänräklär alarnı añlarğa tırışu kiräk, dip täqdim itälär ikän.

Ölkä Mäğärif idäräse mäktäplär xällären tikşergän. Citeşsezleklär – bixisap. Menä berniçäse. Ölkä üzägeneñ baytaq mäktäplärendä balalarğa birelgän rizıqnıñ alarğa barıp citmäwe açılğan. Yäğni urlaşu bula inde bu. Küp rayonnarda partalar uquçılarnıñ gäwdäsenä turı kilmi: umırtqa söyägeneñ käkräyue mömkin.

Kuzovat rayonı Praskov'ino awılında ata-analar eçälär, balalar mäktäpkä yörmi, ä mäktäp citäkçelege moña bitaraf.

Bazarlı Sızğan rayonı awılları mäktäplärendä “ata-analar belän kileşü nigezendä” dip, alardan aqça taläp itälär.

Şundıy şartlarda qatnaş xalıqlı qala-salalarda berdän-ber tatar mäktäbe üzen niçek xis itä soñ? Mäläkäs şähäreneñ 22-mäktäbe direktorı Mönirä Djumaeva äytüençä, bik yaxşı. Uqu yılı başlanğannan soñ da 30dan artıq yaña uquçı kilgän. Bulaçaq berençe sıynıfqa da artığı belän yazılğannar inde. Dimäk, saylap alu mömkinlege dä bar. Ana telendä say yözüçe balalar da bulaçaq – alar öçen ayırım metodika eşkärtelä.

İñ möhime: mäktäp ğoref-ğadätlärebezne qaytaru buyınça kiñ eşçänlek alıp bara. Közen “Sömbelä” bäyräme uzdırğannar, xalqıbıznıñ xezmät söyuçänlek sıyfatın danlaw çarası bulğan ul. Moña qadär Sömbeläneñ närsä ikänen dä belmägän ata-analar moña bik nıq şatlanğannar.

Alar initsiativası buyınça, balalarğa Qorban aşı oyıştırğannar. Çırşı bäyräme dä ana teleneñ qullanış dairäsen kiñäytügä yärdäm itä. Nänilär häm ölkännär öçen ayırım oyıştıru da ğibrätle. Çönki, di Mönirä xanım, nänilär citdi spektakl'ne añlap betermägän bulırlar ide.

Ä menä Näwrüz bäyräme waqıtında karantin bulğanlıqtan bu bäyräm aprel' başına küçerelgän.

Plannarı da baytaq. Ciñüneñ 60 yıllığına bağışlap, milli köräş bäygese äzerlänä. Moña qädär şähär külä(mendä oyıştırılıp kilüçe Ürnäk ğailä bäygesendä tatar ğailäläre, nigäder, cälep itelmägän. 5 balalı ber tatar ğailäsen şul bäygegä äzerlilär. Mönirä xanım fikerençä, bu çaranıñ ähämiäte bi-ik zur bulaçaq.

Qısqası, bu yaña ğına täpiläp kitkän mäktäp – mäktäp kenä tügel, ä Mäläkästä yäşäwçe millättäşlärebezneñ Mädäni üzäge bulıp ta xezmät itä. Avtonomiä barlıq, diärlek, çaraların da şuşı binada oyıştıra.

“Azatlıq” radiosı, Ayrat İbrahim, Mäläkäs – Sember.

XS
SM
MD
LG