"Qırğızstannıñ bärep töşerelgän prezidentı Askar Aqaev wazifasınnan kitüen iğlan itergä tieş." Bu süzlärne Yevropada İminlek häm Xezmättäşlek oyışması başlığı Dimitri Rupel bügen Bişkäktä Qırğızstannıñ yaña citäkçelege belän oçraşqannan soñ äytte. Anıñ süzlärençä, Yevropada İminlek häm Xezmättäşlek oyışması, Qırğızstannıñ säyäsi tormışında Aqaev prezidentlığı çorı betkän dip sanıy häm bu üzgäreşne mömkin qädär tizräk räsmiläşterergä kiräk. Berük waqıtta Rupel, Aqaev ilneñ säyäsi tormışınnan çitlätelmäskä tieş, Aqaev belän yaña citäkçelär arasındağı söyläşülär ildäge kierenkelene kimeter, digän ömet belderde. Ber atna elek Qırğızstan oppozitsiäseneñ qarşılıq çaraları näticäsendä prezident Aqaev ilen taşlap kitte. Xäzerge waqıtta ul Rusiädä.
