Accessibility links

пәнҗешәмбе, 8 декабрь 2016, Казан вакыты 17:21

Tatarstanda su basuğa äzerlänälär


Tatarstanda da comğada 1 aprel’ – Kölke könen bilgeläp üttelär. Xäyer, bıyıl Qazannıñ üzägendäge Bauman uramında yıl sayın ütä torğan bäyräm çaraları, xalıqnıñ bergä cıyılıp küñel açu çaraları oyıştırılmadı. Şähär xakimiäte monı Qazannıñ üzägendä meñyıllıq uñayınnan alıp barıla torğan tözekländerü eşläreneñ bik küp urında alıp barılğanı belän añlattı. Başqala maturlana, tözelä, anda xätta bäyräm itärgä dä urın yuq. Läkin xalıq moña qarap qına Kölke könen iğtibarsız qaldırmadı – üzara şayarttı, üzençä bäyräm itärgä tırıştı. Mäğlümät çaraları da älege eşkä üz öleşen kertte. Mäsälän, Yaña ğasır telekanalı irtännän ük tamaşaçılarğa berniçä maxsus yañalıq xäbär itte. Xäbärçelär täfsilläp Qaban külennän nihayät tabılğan xan xäzinäläre häm alarnı tizdän inde kürergä mömkin bulaçağı turında söyläde, Holliwoodta Tufan Miñnullinnıñ Äldermeştän Älmändäre buyınça fil’m töşerergä niätlänüe turında xäbär ittelär häm anda Äcäl rolen başqarırğa çaqırılğan Rawil Şäräfievtän şuşı xaqta soraştı. Qazannıñ üzägendäge Bolaqnı cir belän kümep, annan tramvaylar yöri başlawı turında da mäğlüm buldı televizor qarawçılarğa Tatarstan-Yaña ğasır kanalınıñ Xäyerle irtä, Tatarstan programmasınnan. Basma mäğlümät çaraları häm internettan alardan qalışmadı – bersennän-berse sensatsion yañalıqlar turında yazdı. Tatar yäşläre dä bäyräm qalışmadı. Tatar kongressı häm yäşlär byurosı da Bauman uramında uzaçaq çaralarda qatnaşırğa dip, tatarça şayartular, şayannar häm tapqırlar komandalarınıñ çığışların äzerlägän bulğan. Läkin bäyräm ütmäw säbäple, alar 1 aprel’ könne xalıqnı küñelen aça almadı. Xäyer, tatar yäşläre moña aptıramıy. Alar inde 21 aprel’dän 25nä qädär ütäçäk tatar teatr studiäläre festivalenä äzerlänä. Anda respublikanıñ yuğarı uqu yortlarında eşläp kilüçe 5 teatr studiäse çığış yasayaçaq.

Xäyer, 1 aprel’ Kölke köne buluğa da qaramastan, Tatarstanda citdi çaralar da buldı comğada. Qazanda Tatarstan İminlek Şurasınıñ vedomstvoara komissiäseneñ utırışı uzdı, dip xäbär itä Tatar-inform agentlığı. Anda narkotiklarnı cäyeldermäw buyınça respublika programması tikşerelde. Cıyılışta kiterelgän mäğlümätlärgä qarağanda, bügenge köndä respublikada räsmi räweştä 7 meñ yarım äf’ünçe terkälgän. Elek alarnıñ sanı kübräk şähärlärdä genä üssä, xäzer älege çir respublikanıñ awıl-rayonnarında da kiñ tarala başlağan. Tatarstanda su basuğa äzerlänälär. Mart ayında yawğan qarnıñ küp buluı, aprel’ başında kisken genä cılıtu kötelü säbäple belgeçlär borçılu belderä. Ğädättäntış xällär idäräseneñ respublika bülekçäse citäkçese Valeriy Vlasov süzlärenä qarağanda, 349 toraq punktın häm anda yäşäwçe 47 meñnän artıq keşene su basarğa mömkin. Bu sannar comğa könne uzğan İdelbuyı okrugındağı töbäklärdä su basuğa qarşı çaralarğa bağışlanğan cıyılışta äytelde.

Gölnaz İlgizär

XS
SM
MD
LG