Accessibility links

дүшәмбе, 5 декабрь 2016, Казан вакыты 15:38

Moñğa öyrätüçe möğallim


Miñğol Ğäliev iseme Tatarstannıñ xalıq artistı, tanılğan cırçısı häm möğallime bularaq bilgele. Anıñ şäkertläre - uqıtuçılar, törle bäygelärdä lawreat häm diplomat isemnärenä layıq bulğan cırçılar. Alar arasında Georgiy İbuşev, Zakir Şahban, Aydar Ğälimov, Ferdinand Sälaxov kebek tanılğan isemnär dä bar.

20 yıldan artıq pedagogiä universitetında vokal däreslären uqıtıp, sälätle balalarnı tabu, alarnı milli sänğätkä iärtep alıp kerü belän Miñğol Ğäliev nıq şöğellänä. Xalıqçan cır sänğäteneñ neçkäleklären öyrätü belän bergä ul yäşlärgä ruxi tärbiä dä señderä. Moñlı keşe berqayçan da naçar bula almawına ul çın küñeldän ışana. Tatarstannıñ törle töbäklärennän, şulay uq başqa respublikalardan da aña sabaq alu öçen möräcäğät itüçelär şaqtıy küp. Alar arasında 3-4 yäşlek sabıylar da, ölkän yäştägelär dä bar. Möğallimneñ üzençälekle uqıtu metodikası tawışnı köyläwdän ğibärät. Tatar cırçılarınıñ tawışın tabiğiläşterügä Miñğol abıy zur öleş kertkän. Şulay da anıñ uqıtu metodikasına tel tiderüçelär dä şaqtıy bulğan. Ämma ul başqarğan eşlärneñ möhimlegen waqıt häm näticälär raslap tora. Küptän tügel genä, mäsälän, anıñ Orenburgta yäşäwçe şäkerte Yekaterinburgta ütkän Rusiä festival' konkursında ciñü ayuladı. Salix Säydäşevnıñ “Ädrän diñgez”e cırın başqarıp, xäzer Mäskäwgä “Salyut pobedı” konsertına çaqıru alğan.

Muzıka belgeçläre Qazanda şaqtıy küp bulsa da, qorı entuziazmda balalarnı çın sänğätkä öyrätüçe, konsert häm başqa çaralar uzdıruçı Miñğol abıylar bik siräk oçrıy. Şähärneñ törle mäktäplärendä konsertlar oyıştırıp, ul uquçılarnı da xalıqçan cır sänğätenä cälep itәrgä tırışa. Çirattağı säyäxät 12 aprel'dä Qazannıñ Mäwletov uramında urnaşqan medkolledj studentları yanına bulaçaq. Ul oçraşuda uquçılar Sara apa Sadıkovanı iskä alıp, anıñ cırların başqarır. Elek-elektän ük şuşı uqu yortında bulaçaq mediklar belän sänğät keşeläre oçraşıp torğan. Qayçandır Sara Sadıkova üze şuşı uqu yortı şäkertläre yanına kilgän. Şulay uq bulaçaq mediklar monda Röstäm Yäxin, Mäxmüt Xösäyen häm başqa küp kenä sänğät ähellären qabul itkän. Ä muzıka belän meditsina arasında bulğan bäyläneşne Miñğol Ğäliev bolay añlata. Daru belän alıştırıp bulmıy torğan närsälär bar. Muzıka ul keşe küñelenä iñ köçle tä'sir itä torğan awaz. Yağımlı awaz ul iñ köçle darularnıñ berse.

Başqa hönärlärgä qayda da öyränep bulsa da, tatar milläteneñ üzenä genä xas bulğan moñ sänğäten fänni yaqtan öyränü Tatarstanda ğına, Qazanda ğına mömkin. Möğallimneñ iñ zur xıyalı da böten dönyağa taralğan tatar milläteneñ sälätle balaların cıyıp uqıta alırlıq cır sänğäte üzägen oyıştıru.

Al'bina Zäynulla

XS
SM
MD
LG