Accessibility links

якшәмбе, 11 декабрь 2016, Казан вакыты 16:57

Tatarstan Däwlät Sovetına 10 yıl


Düşämbe könneñ töp waqiğası – Däwlät Sovetınıñ xäzerge räweştä tözelüenä 10 yıl tuluın bilgeläp ütü. Sovet zamannarında formal' räweştä Mäskäwdän töşkän qanunnarnı raslap utıruçı Verxovnıy Sovet suverenitet yıllarında çınlap ta qanun proektın äzerläwçe häm raslawçı orğanğa äylände. Döres, ul törle säyäsi basımnar astında yäşi, üze qabul itkän qanunnarnı üze köçennän çığara, anda eşläwçe deputatlar xakimiät oyışmaları häm firqälär tarafınnan bilgelänä. Ämma, barıber, xalıq isemennän eş yörtüçe bu oyışma üzeneñ möstäkıyl' ber xakimiät tarmağı ikänen onıtmıy. Düşämbe könne Däwlät Sovetında respublika parlamentınıñ eşçänlegenä bağışlanğan fotokürgäzmä açıldı. Şulay uq, Däwlät Sovetınıñ räise bulıp eşlägän Vasiliy Lixaçevnıñ yaña kitabı täqdir itelde. Rusiä häm Yevropa berlegeneñ xalıqara sistemada totqan urını turındağı bu kitapta diplomatlar, säyäsätçelär öçen bik qimmätle çığanaq häm anıñ cirlege Tatarstannan başlana. Töştän soñ Aq bars mädäniät üzägendä Tatarstanda parlamentarizm häm demokratiä üseşenä bağışlanğan fänni-praktik konferensiä açıldı. Bu çarada törle taraflardan kilgän ğalimnär, respublikanıñ däwlät häm cämäğät eşlekleläre qatnaşa. Xäbärçebezneñ bu çaradan äzerliäçäk reportajın kiläse tapşıruda tıñlağız. Rim papasın Qazan da xäterli Rim Papasınıñ wafat buluı da qazanlılarnı bitaraf qaldırmadı. Beräwlär anıñ uzğan ğasırlardağı täre poxodları öçen täwbä qıluın xörmätläp iskä alalar, ikençeläre, Qazan İzge ana ikonasın Rusiägä qaytarıp birüenä iğtibar itälär. İkona Mäskäwgä qayttı, anıñ öçen Qazanda da maxsus bina äzerlänä. Äytergä kiräk, ikonanı qaytarırğa xästärläp yörü cämäğätçelek arasında ber törle genä fiker uyatmıy. Şimbä könne bulıp ütkän İctimaği üzäk qorıltayında Qazan xaqimiäte başlığınıñ ikona häm täre tiräsendä aktivlıq kürsätüe tiskäre bäyälände. Xäyer, bu tema , ictimaği üzäkneñ qorıltayı delegatları öçen berdänber möhim problema,- dip äytep bulmıy. Kiresençä, soñğı waqıtta milli xäräkät tormışında çişelmägän töennärneñ sanı iskitkeç küp. Şularnıñ iñ möhimnäre – berläşü, millät häm respubliqa yazmışına tä'sir itärlek gämällär qılu, xalıqnı ictimaği eşçänlekkä cälep itü buldı. Rimzil Wäli

XS
SM
MD
LG