Accessibility links

шимбә, 3 декабрь 2016, Казан вакыты 01:37

Putin-Lukaşenko oşraşuı, anıñ näticäläre.


Russiä häm Belorusnıñ prezidentıları Putin belän Lukaşenko Soçidä oçraştılar. Alar ikeyaqlı mönäsäbätlärne häm BDBnı reformalau mäsäläsen tikşerdelär. İke yaq ta duslarça mönäsäbätlär xökem sörä dip beldersä dä, xäl itelmägän mäsälälär bar.

Putin beäln Lukaşenko soñğı märtäbä uzğan yılnıñ Üktäber ayında oçraşqannar ide. Ul vaqıttan soñ kürşe illärdä möhim zur üzgäreşlär buldı. Ukrainada äfilsun revolutsiäse, Moldovada parlament saylauları, Qırğızıstanda prezident Akayevne xakimiättän quıp cibärü bolarnıñ in möhimnäre. Bu vaqiğälär BDBnı da der kiterde häm Belorus citäkçelegen küberäk izolätsiägä kertte. Bu şulay uq Russiä, Belorus, Ukraina häm Qazaxstannan torğan Urtaq Ekonomik Kiñlek buldeıu planın ğämälgä quyu mömkinlegen dä şik astında qaldırdı. Yevropa Berlegenä yaqınlaşuğa küberäk ähämiät birgän Kıevneñ yaña citäkçelege monıñ belän qızqsnımauın belderä. Russiä-Belorus Berlegen buldıru planında söyläşäse äyberlär küp. Belorus ğinvar ayında uq Russiä rubelen qullana başlarğa tieş ide, ul plan da ber yılğa kiçekterelde. Minsk budjetındağı defitsitnı Mäskäv finansiälärgä tieşme digän mäsälädä dä fiker ayırmalıqları tirän. Russiäneñ Belorusqa gaz tapşıruı mäsäläse bıyıl öçen xäl itelde. Läkin, ozın möddätle gaz kileşüe yuq. Putin bügen irtän jurnalistlarğa üzara mönäsäbätlär yaxşı dip belderep, problemmalarnı telgä almadı.

Audio

"Ekonomik üseş bar. Üzara sävdä balansı arta. Allahğa şöker , belgänemçä, energetika problemması yuq. Bezneñ energetika belgeşlärebez Belorus kollegaları belän daim elemtädä toruların miña belderälär."

Lukaşenko da şuluq eçtälektä söyläde.

Audio

"Bezneñ oçraşuda üzara mönäsäbätlärneñ yaxşılığı xaqında işarä cibärü iñ möhim närsä. Xalıq mönäsäbätlärebezdä nindider problemmalar bar, şul säbäple bez oçraşmıybız dip uylamasın. Añlağanımça, bezneñ mönäsäbätlärdä problemmalar yuq."

Läkin , Lukaşenko BDBnıñ kiläçäge tikşereläçäk dip iqrar itte.

Audio

"Läkin, bez başqa mäsäläne tikşerergä häm bu ölkädä qaraşlarıbıznı çağıldırırğa tieşbez. Ul da bulsa BDB häm dänyadağı täräqqiät. Beznenñ yäşererlek närsäbez yuq. Russiä-Belorus bäyläneşlärendä bezneñ ber nindi dä problemma yuq."

Üz nävbätendä Putin dä monıñ belän kileşte häm Sovetlar Berlege tarqalğannan soñ xasıyl bulğan buşlıqnı tutıru öçen oyıştırılğan BDB tözeleşen Yevropa Berlegenä oxşaş itep üzgärtergä kiräk dide. Oçraşudan soñ, Putin belän Lukaşenko press konferensiä ütkärdelär. Putin urtaq valyuta mäsäläsenä qağılıp, bu bik möhim, ul centekläp tikşerelergä häm äzerlänergä tieş dip belderde. Putin üzeneñ çığışında tikşerelgän mäsälälärne ğomumi bularaq telgä aldı.

Audio

"Bez ike ilneñ iminlege belorus häm rusisä vatandaşlarnıñ xoquqların tämin itü mäsäläsendä xökümät dairäläreneñ üzara xezmättäşlegen tikşerdek. Bez şulay uq törle xökümät agentlıqlarınıñ üzara xezmättäşlegen dä tikşerdek."

Lukaşenko Bötendönya Sävdä Oyışmasına ağza bulıp kerü ike il arasındağı sävdä şartlarına tiskäre täsir yasamasqa tieş digän mäsälädä kileştek dip äytte. Ul şulay uq BDB mäsäläsenä qağılıp anıñ potansialı äle bar digän fiker belderde.

Audio

"Bez BDB yäşäp qalırğa tieş digän qätği qararğa kildek. BDB töp konsepsiä mäsälälärendä qarar birerlek xäldä bulmasa da, ul yuğarı däräcädäge kiñäşläşü häm fiker alışu urnı bularaq qalırğa tieş."

İke citäkçe kiläse ayda Mäskävdä yañadan oçraşunı planlıylar.

Färit İdelle, Praga.
XS
SM
MD
LG