Accessibility links

шимбә, 3 декабрь 2016, Казан вакыты 20:45

Omkskida näşer itelä torğan ”Tatar dönyası” gazetasınıñ çirattağı sanı dönya kürde


Mäğlüm bulğança, räsmi terkälmägän älege aylıq basma 2003-nçe yılnıñ dekaber ayınnan 999 danä bulıp çığıp kilä. Gazeta bügenge köngäçä eşmäkär Tamir Alimbaev isäbenä tatar cämäğätçelege tırışlığı belän çığarıla häm şulay uq cämäğätçelek köçe belän taratılıp tora. Anıñ bitlärendä ölkädäge tatar tormışı, ayanıçları, quanıçları, bäyrämnäre, tanılğan şäxesläre turında mäqälälär urın ala. Şulay uq balalarğa, dingä, uquçı xatlarına bağışlanğan säxifälär bar, iğlannar basıla.

Gazetanıñ yaña ğına tabadan töşkän sanınıñ berençe bitendä, ölkä tatar milli-mädäni moxtariäteneñ bügenge köndä könüzäk bulıp torğan probleması turında mäqälä basılğan. Mäqälädä yaña yıldan arenda bäyäläreneñ küpkä artuı säbäple moxtariätneñ awır xäldä qaluı belderelgän, gazetanı uquçılarğa yärdäm sorap möräcäğät itelgän.

Aldağı säxifädä Kolosovka rayonı tatar mädäniät üzägeneñ eşçänlege turında yazmalar dönya kürgän. Anda, küptän tügel üzäkneñ räise itep Kolosovka tatarları arasında zur ixtiramğa iä bulğan, ozaq yıllar Tuskimä awılı mäktäbendä direktor bulıp eşlägän Ğali Räşit ulı Cälilovnıñ bilgelänüe, üzäk tarafınnan tatar xalqınıñ mädäniäten, ğoref-ğadätlären, telen üsterü östendä küp törle eşlär alıp barıluı, “Mäxäbät” ansambleneñ uñışlı eşläp kilüe, kürşe rayonnarda da tanılıp ölgerüe turında yazılğan. Bu uñaydan Tara şähäre tatar mädäniät üzäge räise İldar Mamatovnıñ mäqäläse basılğan. Älege mäqälädä İldar äfände “Mäxäbät” ansambeleneñ Tara mädäniät yortı säxnäsendä yasağan çığışına yuğarı bäya birgän. Kolosovka tatar mädäniät üzäge tırışlığı belän rayon üzägendä möselman ziratı buldıruğa ireşkännär. Moña qädär märxümnärne Kolosovkadan 10-12 çaqrım yıraqlıqta bulğan Kügätäw, Tuskimä awıllarına alıp barıp cirlägännär. Bu turıda gazetada “Kolosovkada möselman ziratı açıldı” digän baş astında Ğali abıy Cälilovnıñ mäqäläse basılıp çıqqan.

Annarı “Tatar dönyası” gazetasında Bol'şereç'ye rayonınıñ Yälankül awılında ğibädät yortı buldıru öçen bina satıp alınuı turında Minzifa Xäyrtdinovanıñ yazması urnaştırılğan. Anda iyün ayında Xäter köne ütkärergä niätläwläre, älege yortnı tözekländerep, beraz cihazlar buldırıp xäter könenä turı kiterep açırğa telüläre turında belderelgän.

“Xıyallar tormışqa aşa” digän mäqälädä Omski tatar yäşlärenä nindi yuğarı uqu yortında belem alırğa mömkin buluı turında yazılğan. Yazmanıñ avtorı Bol'şereç'ye rayonınıñ Çarnalı awılı qızı Zölfirä Muraleewa, Tubıl pedagogiä institutınıñ tatar- ingliz telläre bülegendä uquı häm bik qanäğät buluı turında yaza, yaqtaşların tatar bülegenä uqırğa kerergä çaqıra.

Gazeta bitlärendä törki xalıqlarnıñ yaña yıl bäyräme näwrez turında da mäqälä urın alğan. Mäqälä avtorı Purexan Sıbır elek Seber tatarlarınıñ bu bäyrämne niçek bilgeläwläre turında yaza.

Tatarstannıñ “İdel” Yäşlär üzägeneñ balalarnı häm yäşlärne cäyge yal urınnarına çaqıruı gazetanıñ soñğı bitendä urnaştırılğan.

“Tatar dönyası”nıñ dini säxifäsendä islam häm anıñ nigezläre turında añlatmalar urnaştırılğan, Möxämmät ğäläyhissälämneñ tuğan köne-Mäwlet bäyräme turında mäkälä bastırılğan.

Balalar säxifäsendä dä dini tema iğtibarsız qaldırılmağan-anda Mäwlet bäyrämen balalar baqçasında ütkärü ürnäge-ssenariy birelgän, häm tatar xalıq äkiäte urnaştırılğan.

Gazeta härwaqıttağıça yaxşı käğäzdä, matur bizäleşle, 8 bitle bulıp çıqqan. Döres, andağı yazmalarnıñ yaqınça öçtän ber öleşe genä tatar telendä, häm kiläçäktä dä ul şuşı räweştä çığarılaçaq. Redaksiä fikerençä, tulısınça tatar telenä küçü uquçılarnıñ sanın kimügä kiteräçäk, tatarça uqı belmäwçelär gazeta belän tanışa da almayaçaqlar.

Rozaliä Sayganova, Omski.

XS
SM
MD
LG