Accessibility links

чәршәмбе, 7 декабрь 2016, Казан вакыты 15:42

Tatarstan fermerları Rusiä xökümäteneñ qararın kötä


Ozaqqa suzılğan qış, salqın, qarlı aprel’ ğädättäntış xällär ministrlığı xezmätkärläreneñ genä tügel, awıl xucalığı tarmağında eşläwçelärneñ dä borçuın tudıra. Basularda äle haman da qar yata, dimäk, bolay da bik qısqa waqıtta başqarılırğa tieşle qır eşlärenä waqıt könnän-kön azraq qala bara. Xäyer, respublikanıñ awıl xezmätkärläre tik utırmıy, çäçü häm cir eşkärtü cihazların, orlıqlarnı äzerli. Tatar-inform agentlığı xäbärenä qarağanda, Tatarstanda xucalıqlar ber-bersendä äzerlek eşläreneñ barışın tikşerä. Respublikanıñ fermerları da qır eşlärenä äzerlänä. Läkin alarnı hawa torışınnan tış, başqa küpsanlı mäs’älälär dä borçıy. Äytergä kiräk, bu problemalar Tatarstannıqı ğına tügel, alar bar Rusiä fermerları öçen urtaq. Uzğan atnada Mäskäwdä ütkän Rusiä fermerları qorıltayında da süz nigezdä şul xaqta barğan. Alda torğan problemalarnıñ iñ kiskene – yağulıqqa bäyälär. Mäsälän, awıl xucalığı texnikasında qullanıla torğan dizel yağulığı – solyarkanıñ bäyäse bıltırğı 6 sumnan bıyıl inde 14 sumğa mengän. Mäskäwdä uzğan qorıltayda Tatarstannıñ fermerlar häm krestyan xucalıqları Assotsiatsiäse wäkilläre dä qatnaşqan. Qorıltaynıñ eşçänlege turında sezgä Assotsiatsiäseneñ Başqarma direktorı Gölfirä Rizaeva söyli.

Mäskäwdä berençe könne keçe eşmäkärlek forumı uzdı. İkençe könne bez Rusiä fermerları qorıltayına cıyıldıq. Anda Rostov ölkäsennän, Krasnodardan wäkillär bik zur borçılu belderdelär yağulıqqa bäyälär yuğarı bulu belän. Alarda bügen-irtä çäçü başlanaçaq bit inde. Yağulıqqa bäyälär üsä, ä qayber fermerlarnıñ äle bıltır üstergän uñış ta satılmağan. Şuşı töbäktän kilgän fermerlar berençe könne xätta açlıq ta iğlan itep qaradılar. Bez Rusiä xökümätenä möräcäğät qabul ittek. Anda yağulıqnıñ bäyäsen töşerergä, aşlıq satu bäyäsen kütärergä, digän taläplär bar. Bu taläplär 16 aprel’gä qädär ütälmäsä, Rusiä fermerları qarşılıq aksiälären oyıştırırğa cıyına

Gölfirä Rizaeva Tatarstan fermerlarınıñ problemaları da başqa Rusiä töbäklärendäge kebek ük, digän fikerdä tora – yağulıq bäyäläre zur, ä üstergän, äzer tawarnı bik tübän bäyägä satıp alalar. Citmäsä, yaña eş başlawçı fermerlarğa cir yäki iske texnika xisabına kredit alu mömkinlege dä xäl itelmägän. Şuña da, Tatarstan fermerları häm krestyan xucalıqları Assotsiatsiäseneñ başqarma direktorı Gölfirä Rizaeva süzlärenä qarağanda, Rusiädäge kollegaları qarşılıq aksiäläre belän çığarğa qarar qılsalar, respublika fermerları da çittä qalmayaçaq. Läkin bu xaqta tögäl qarar älege qabul itelmägän. Qarşılıq aksiäse 16 aprel’dän soñ, Rusiä xökümätenä citkerelgän qararlar xäl itelmäsä başlanıp kitäçäk.

Gölnaz İlgizär

XS
SM
MD
LG