Accessibility links

пәнҗешәмбе, 8 декабрь 2016, Казан вакыты 21:05

Omskida Zaqir Şahban konsertı


Sibelep yäşägän xalqıbızğa tatarlığın saqlawda yärdäm itep, ilne iñläp-buylap yörgän İlham abıy Şakirov, Älfiä apa Afzalova, Xämdünä Timerğaliewa, Gölzada Safiullina, Zöhrä Şärifullina, Azat Xösäyen-Timerşäyex, Lena Biçarina, Älfis Kıyämov, Xänäwi Şäydullin, Wäfirä Ğizatullina kebek mäşhür artistlarıbıznıñ, “Zaman”, “Bolğar”, “Qazan qızı” törkemnäreneñ häm başqalarnıñ qayçandır konsertlar belän Omskida yış qına buluların bügen dä sağınıp iskä töşerälär. Ämma zamanalar üzgärep, yıraq töbäklärdä konsertlar oyıştıru ütä qatlawlanğaç, Tatarstan artistları belän oçraşular sirägäyde. Yarıy äle xäzer dä artistlar arasında çit töbäklärdä yäşäwçe tatarlarğa milli can örep yörüçe tınğısız yöräklelär yuq tügel. Çığışı belän Seber yağınnan bulğan millättäşebez, Tatarstannıñ atqazanğan artistı Zaqir Şaxban şundıylardandır möğayın. Uzğan şimbä, yäkşämbe könnärendä anıñ citäkçelegendä Tatarstan artistları törkeme Omski häm Novosibirski şähärlärendä bulıp kittelär.

Zaqir Şahban belän anıñ icattaş dusları- cırçı häm alıp baruçı Fännür Xäsänov, skripkaçı İldar Nigmätcanov, yäş cırçı Güzäl Gallämova, biyuçe İldar Xämidullin buldılar. Konsertqa xalıq küpläp kilgän, 600 keşe sıyışlı zalda alma töşärlek urın da qalmağan ide dip äytergä bula. 3 säğätkä yaqın yañğırağan cır-moñnarnı tamaşaçı tın almıyça tıñladı,İldar Xämidullinnıñ iyüllärenä soqlandı, artistlarnıñ här çığışın köçle alqışlarğa, çäçäklärgä kümde. Mondıy oçraşu tamaşaçı öçen genä tügel, artistlar öçen dä bäyrämgä äwerelde.

Yıraq säfärgä, Seber yaqlarına berençe märtäbä çıqqan Güzäl Gallämovanı konsertta yäşlärneñ az buluı borçıy. Fännur Xäsänov tamaşaçınıñ här süzne añlap, çın küñeldän qabul itep utıruına iğtibar itkän.

Zaqir Şaxban üze dä bu säfärennän qänäğät buluın belderde, konsertlarnı oyıştıru yıldan-yıl awırlaşsa da eşlärgä kiräk dide, millätne saqlap qaluda mömkin bulğan qadär üzeneñ öleşen kertäçäge turında äytte.

Şulay zur awırlıqlar belän oyıştırılğan mondıy eşkä başqa alınmam axrı digän Zaqir Şahban, Omskidan kitkändä, cäy aylarında seber yağındağı tatar awıllarına da konsertlar belän barıp çığarğa niätläwe turında belderde. Millätpärvär artistnıñ izge niätläre tormışqa aşsın dip telärgä qala.

Rozaliä Sayganova, Omski.

XS
SM
MD
LG