Accessibility links

чәршәмбе, 7 декабрь 2016, Казан вакыты 11:43

Başqortstan oppozisiäse "soñğı sulışqaça" köräşergä niätli


Başqortstan xakimiätläre belän oppozissiä köçläre arasındağı köräş iñ kierenke öleşenä kerä. Bu xaqta Başqortstan Tatar cämägätçelek oyışmaları berlege räise, Başqortstan oppozissiäse koordinasiä şurası citäkçese Ramil Bignov Mäskäwdä atnaqiç oyıştırğan uram cıyınınnan qaytıp töşkäç belderde. Uzğan proğrammabızda äytelüençä, Başqortstannıñ oppozisiä xäräkätläre häm partiäläre wäkilläre, cämğıse 220 gä yaqın keşe Mäskäwdäge Lubyanka mäydanında Başqortstan prezidentı Mortaza Räximovnı wazıyfasınnan alunı taläp itep, uram cıyını ütkärde. Ul cıyınnan soñ oppozitsiä köçläre Rusiä prezidentı Vladimir Putin isemenä Mortaza Räximovnı urınınnan alunı taläp itep, Başqortstannıñ 107 meñ keşese imzası quyılğan möräcägätne tapşırıp qayttı. Başqortstan räsmi xakimiätläre dä tik yatmıy. Alar üzlären tänqitlägän oppozisiä xäräktälärenä häm alarnıñ citäkçelärenä qarşı räsmi matbuğat çaralarında yaña dulqın cawap höcüme başladı. Atnakiç könne xökümät qaramağındağı «Başinform» mäğlümat ağentlığında respublikadağı qayber milli oyışmalar citäkçeläre matbuğat oçraşuı ütkärep, oppozisiäne ğayepläp çıqqannan soñ, comğa könne respublikanıñ barlıq räsmi gäzitläre oppozitsiäne häm anıñ başlığı Ramil Bignovnı sükkän külämle yazmalar bastırıp çığardı.«Moskovskiy komsomoles v Ufe» gäzitendä basılğan şul yazmanı barlıq gäzitlärneñ üzlärendä dä bastıruı xaqimiätlär kürsätmäse belän eşlängänlegenä ber açıq işarä. Comğa könne jurnalistlar belän aralaşuda Ramil Bignov ta ul yazmalarnıñ zakaz belän yazılğanlığın äytep, alarnı çığarğan gäzitlärne mäxkämägä biräçägen belderde. «Başqortstan xakimiätläre üzläre muyınnan uq gönahqa batqan, – di Ramil Bignov. – Respublikanı alardan azat itü öçen oppozisiä köçläre soñğı sulışqaça köräşäçäk. Xäzer oppozisiäne wäkillek itkän oyışmalar häm partiälär aldağı könnärdäge qarşılıq çaralarına äzerlek alıp bara. Kiläse şundıy çara 16 apreldä Ufada oyıştırılaçaq, di Ramil Bignov. Şulay itep, Başqortstan oppozitsiäse Mortaza Räximovnı prezidentlıqtan töşermiçä, köräşen tuqtatmayaçağın belderä. Başqortstandağı ictimaği-säyäsi xälgä häm Mäskäwdä kiçä uzğan uram cıynına inde işetkänegezçä, törle reaksiälär belderelä, xörmätle tıñlawçılar. Bügen Qazan däwlät universitetında Rusiä imperiä häm millät arasında dip isemlängän kiñäşmä uzdı. Azatlıq radiosı xäbärçeseneñ Başqortstandağı xällärgä nindi bäyä biräsez digän sorawına Etno-säyäsi öyränülär üzäge başlığı, elekke prezident Boris Yeltzinnıñ kiñäşçese bulğan Emil Pain, anda 3 refolüsiä çağılışı küzätelä, andağı täcribäne öyränälär häm bu Rusiädäge wazğiätkä dä tä'sir itä, dip belderde: "Şulay uq bu wazğiät miña 1905nçe yılnı xäterlätä. Xalıq moña äzer tügel. Ul çaqta da xalıq cirle citäkçelärgä açuı kilep aqıllı patşa yanına barır da wazğiät üzgärer dip ömetlände. Läkin alar ozaq kötmäde, alarnı atıp üterdelär. Monda ozağraq kötergä turı kiler ämma azağı şundıy uq bulaçağı şiksez."

XS
SM
MD
LG