Accessibility links

шимбә, 3 декабрь 2016, Казан вакыты 12:48

Ufada «Tuğan tel – 2005» sänğät bäygese tämamlandı


Comğa könne Ufada tatar cırı başqaruçılarnıñ VI respublika konqursınıñ yomğaqlaw öleşe, gala-konsert bulıp ütte. «Tuğan tel – 2005» dip isemlängän älege bäyge öç kön däwam itte. Konqursqa saylap alu turı başta rayonnarda häm şähärlärdä ütkän ide. Ufadağı yomğaqlaw öleşenä 24 rayonnan häm 9 şähärdän citmeştän artıq başqaruçı saylap alındı. Sänğät bäygesendä 16 yäştän alıp 35 yäşkä qädär bulğan üzeşçän başqaruçılar qatnaştı. Alar üzläre saylap alğan tatar xalıq cırların häm estrada äsärlären, barlığı dürtär cır başqarıp köç sınaştı. Konqursantlarnıñ başqaru ostalığın Ufa sänğät aqädemiäse professorı, Başqortstannıñ atqazanğan sänğät eşleklese Rima Musina citäkçelegendäge abruylı jüri bäyäläde. Başqa yıllarda da älege qonqurs yaña isemnärne baytaq qına aça ide. Bıyıl da şulay buldı. Jyüri äğzalarınıñ berse, şuşı atnada ğına Rusiäneñ atqazanğan artistqası isemenä layıq bulğan kürenekle cırçı Näzifä Qadıyrowa süzlärençä, Başqortstanda Yaña ber dulqın talantlı yäşlär kilä. «Alar bezneñ kiläçägebez, – di Näzifä xanım. – Tatar cır sänğäteneñ Başqortstanda balqışlı irtägäse köne buluı şatlandıra». «Tuğan tel – 2005» respublika bäygeseneñ ğala-konsertı Başqortstan däwlät filarmoniäse binasında ütte. Anda ciñüçelär belän diplomantlar bilgelände häm alarğa büläklär tapşırıldı. Gran-priğa Oqtyäbrskiy şähärennän 18 yäşlek Filüs Qähirov layıq buldı. Ul muzıyka uçilişçesında belem ala ikän. Aña jyüri äğzaları kiläçäktä Ufadağı sänğät aqädemiäsenä uqırğa kerergä täqdim dä yasadı. Bäygedä berençe urınnı İşembay şähärennän İlşat Yapparov aldı. İkençe urın ike keşegä birelde. İleş rayonınnan 9 nçı sıynıfta ğına uquçı Fänis Yäxin üzeneñ soqlanğıç moñlı tawışı belän tañ qaldırdı jyüri äğzaların. Täteşle rayonınnan Niäz Xämätşin da uñışlı çığış yasadı häm şulay uq ikençe urınğa layıq buldı. Öçençe urınnı dürt keşe – Büzdäk rayonınnan Denis Noğmanov, Yañawıldan Miläwşä Ğälinä, Baqalıdan Änis Xäbibullin häm Ufa rayonınnan Liliä Yamurowa büleşte. «Tuğan tel – 2005» tatar cırı bäygesendä başqa nominatsiälärdä därtländerü premiäläre dä tapşırıldı. Gala-konsertta älege bäygedä ciñüçelär belän bergä tanılğan cırçılar Näzifä Qadıyrowa, Fädis Ğäniev, Florida İsmäğilewä, Ayrat Xaliqov, Rifkät Ğabdelcanov, şulay uq «Tuğan tel – 2003» bäygesendä ciñep çıqqan talant iäse, Ufa «Nur» tatar däwlät drama teatrı aqtrisası Gölnaz Möxämmädiewa da çığış yasadı häm tamaşaçılarğa çın sänğät bäyräme büläk itte.

Fänis Fätxi, Ufa

XS
SM
MD
LG