Accessibility links

Кайнар хәбәр

1000 yıllıq Qazan – www.1000kzn.ru


«Tatnet yoldızları-2005» digän bäyge başlanuı turında xäbär itkän idek. Älege proyektnıñ koordinatorı Aynur Sibğatullin, ber atna eçendä, bäygedä qatnaşırğa teläweçlärdän qarizalar kilüe turında xäbär itte. Nindi yaña saytlar jyuri iğtibarın täqdim itelde, nindi yaña avtorlar qatnaşa – bu xaqta äle xäbär itelmi. Oyıştıruçılar kötärgä täqdim itä.

Tatarlar.ru säxifäsendä «Yıl tatarı -2004» digän soraştıru däwam itelä. Tawış birüdä qatnaşularğa 15 keşe arasındağı «Yıl tatarı» isemenä layıq ber şäxesne saylarğa täqdim itelä. İnde xäbär itkänçä, anda Alina Kabaeva, Zilä Wälieva, Zölfiä Kamalova, Rinat İbrahimov häm başqalar da bar. Yazularğa qarağanda tawış beleşterüdä qatnaşqan keşelär 700gä qädär artan. İnde ber niçä atna rättän, «Yıl tatarı» bäygesendä Mini Miss, qızlar arasında çibärlär bäygesendä ciñgän Daniä Ğöbäydullina bara. Aña 18% tawış birelgän, ikençe urında, 17% tawış belän, Fändäs Safiullin bara. Protsentlar häm alda baruçılar isemnäre inde küptännän üzgäreşsez tora. Ämma Daniä Ğöbäydullinanı ciñüçe dip sanarğa bulamı yuqmı, tatarlar.ru säxifäsendä xäbär itelmi.

Ütkän tapşıruda, «Microsoft» şirkäte üz programmaların tatarçalaştıru belän şöğellänä, dip söyläşkän idek. «Tatarskaya gazeta» forumında (www.yuldash.com/tg) qatnaşuçılar «Microsoft» programmaların qullanuçılarğa tatarça kirill xäreflär belänme, ällä latinça belän yazarğa täqdim itäme, digän temanı tikşerder. İsegezdä bulsa, Alia xanım isemle forumçı, «Microsoft»qa bu sorawlarnı yullawı turında häm cawabı belän başqalarnı da tanıştırırğa wäğdä itkän ide. Ul xanım wäğdäsen ütäde. «Microsoft» cawabın bastırıp çığardı. Şirkät xatına qarağanda, şunı belep bula. «Microsoft» şirkäte Tatarstan xökümäte belän söyläşülär alıp baruın häm tatarçalaştıru belän şöğellänüen raslıy. Ämmä süzleklär, multi-media öyrätü programmaların yasarğa cıyınmıy. Bu eş belän cirle belgeçlär şöğellänäçäk. Tatarçanıñ nindi grafikada buluı turında xatta cawap birelmi. Kileşüneñ başqa yaqları – kiñ cämäğätçelek öçen ser bulıp tora. Şuña kürä, tatar teleneñ grafika mäs’äläse – açıq bulıp qala.

Axırda, ber yaña sayt belän tanışıyq. Qazannıñ 1000 yıllığına bağışlanğan räsmi internet sayt - www.1000qazan.ru digän adresta urnaşqan. Bu xaqta tapşırularıbızda söylägän idek inde. İnde xäzer www.1000kzn.ru digän säxifäneñ açıluı turında xäbär itelde. Bu säxifä şulay uq, Qazannıñ 1000 yıllığına bağışlana häm anda bäyrämgä äzerlänü barışı turında mäğlümatlar tuplana. www.1000kzn.ru saytı kübesençä yañalıqlardan tora da. Anıñ tatarça bülege dä bar. Kirill tatar xärefläre belän. Qızğanıç, «Azatlıq» radiosı kompyuterlarındağı sistema, küp tatar telendäge saytlarnı kürergä mömkinlek birä, ämma, bu säxifäneñ tatarça xäreflären döres kürsätmi. Başqa qullanuçılarğa dä www.1000kzn.ru saytınıñ tatarçasın uqır öçen, üz kompyuterların saytqa yaraqlaştırırğa turı kiläçäk. Bu qatlawlı eşne eşlägännän soñ ğına, säxifädäge qızıqlı mäğlümatlar belän tanışıp bulaçaq. Yaña ğına açılsa da, «1000-lıq Qazan» digän säxifädä forum bülege bik aktiv eşli, andağı yäşlär, Qazannıñ bäyrämgä äzerlek waqıtında, bökelärdä utırıp, tözeleşlärne urap uzıp, pıçraq yullardan yörü kebek qıyınlar temasın tikşerep beterde inde. Säxifä Rusiäneñ massaküläm kommunikatsiälär agentlığınıñ finans yärdäme belän eşlänä dielä. www.1000kzn.ru.

Bikä Timerova..

XS
SM
MD
LG