Accessibility links

сишәмбе, 6 декабрь 2016, Казан вакыты 08:47

Şaronnıñ Amerika säfäre - üzäktä yähüd qasabaların kiñäytü mäs''äläse tora


İnde äytelgänçä, İzrail premyer-ministrı Ariel Şaron bügen räsmi säfär belän Quşma Ştatlarğa yul tottı, xörmätle tıñlawçılar. Bezneñ köndälek küzätü şul xaqta. Düşämbedä Şaron George Bush belän söyläşülär ütkäräçäk, bu oçraşu amerikan prezidentınıñ Texastağı utarında uzaçaq. Amerikan yağı İzrail premyerınnan Könbatış yardağı yähüd qasabaların kiñäytmäwne taläp itäçäk dip kötelä.

Ber atna elek kenä Ariel Şaron, Yerusalim yanında urnaşqan Maale Adumim qasabasın kiñäytü plannarı turında beldergän ide, anıñ, bu eş hiç kenä dä citdi problema bulıp tormıy dip äytüe xäbär itelde. Maale Adumim İzrail basıp alğan fälästin cirlärendä iñ zur yähüd qasabası bulıp tora, anda bügenge köndä 30 meñläp keşe yäşi. Ämma anı kiñäytü plannarı fälästin yağında zur borçu uyata, alar İzrail şulay itep fälästinlelärgä könçığış Yerusalimgä ütü yulın yaba dip şürli. Mäğlüm ki, alar üzläreneñ kiläçäktä qorılaçaq bäysez fälästin däwläteneñ başqalası itep näq menä könçığış Yerusalimne kürä. Uzğan sişämbedä amerikan prezidentı bu mäs''älädä Ariel Şaronğa basım yasap, anı solıx planı xaritasınnan taypılmasqa öndiäçägen äytkän ide. Şul planda inde bulğan yähüd qasabaların kiñäytü tıyıla. Washingtonda urnaşqan fiker üzäge - Fälästin mäs''äläsendä amerikan eş törkeme belgeçe Xösäyen İbiş uylawınça, premyer Şaronnıñ Maale Adumim qasabasın kiñäytü qararı, İzraildäge häm xökümätneñ üzendäge ütä millätçe yähüd dairälären tınıçlandıru omtılışı bula ala, alar İzrailneñ Gazadan kitüenä zur qänäğätsezlek belderä. Läkin İbiş, Maale Adumimne kiñäytü solıxqa ireşü ömetlären yuqqa çığara ala, çönki bu fälästinlelärneñ Yerusalimgä ütü yulların yabaçaq dip kisätä:

Audio, Xösäyen İbiş

"Fälästin däwläten Yerusalimsez qoru - ul kileşüne yuqqa çığaruçı närsä. Härkem çiklär, fälästin qaçaqların qaytaru häm Yerusalimneñ kiläçäktä nindi statusqa iä bulaçağı mäs''äläsendä sığılmalı bulırğa tieşlegen tanığanda da, könçığış Yerusalimneñ İzrail cirenä äylänep, fälästinlelärneñ aña ütep kerä almawı häm alarnı annan çitläşterü, bu baştan uq üle ber närsä", di Xösäyen İbiş. Uzğan ayda amerikan däwlät sekretare Condoleezza Rice ta, Maale Adumim häm könçığış Yerusalim arasında yaña yortlar tözü solıx eşläreneñ tulısınça tuqtap qaluına kiteräçäk dip kisätkän ide. İzrail Yerusalimne üzeneñ berböten häm bülenmäs başqalası itep kürä, ämma bu başqa illär tarafınnan tanılmıy. Maale Adumim qasabasın kiñäytep häm anı könçığış Yerusalimgä totaştırıp İzrail üzeneñ şul küptänge maqsatına, şähärne üzeneke genä itügä yaqınaytırğa tırışa. Fälästin yağında xäzer, İzrail xökümäte Gazadan kitü bäräbärenä üzeneñ Könbatış Yardağı qasabaların nığıta başlayaçaq digän şik köçäyä. Gazadağı yähüd utarlarında barı tik 8 meñ yarım yähüd kenä yäşi, ä menä Könbatış Yarda alar sanı 240 meñgä citä. Quşma Ştatlar prezidentı Bush Yaqın Könçığışta solıxqa ireşüne ikençe prezidentlığınıñ töp maqsatlarınnan berse itte. Kiläse ayda anıñ fälästin citäkçese Mäxmüt Ğabbas belän dä oçraşuı qaralğan.

Kärim Kamal
XS
SM
MD
LG