Accessibility links

пәнҗешәмбе, 8 декабрь 2016, Казан вакыты 23:10

Qazanda çirattağı qarşılıq çarası ütte


Uzğan yäkşämbedä Qazanda Qamal teatrı qarşında miting ütte. Bu yulı monetizatsiä häm toraq-kommunal' xucalıq reformalarına bağışlanğan mitingnı İctimaği palata oyıştırğan. Ğädättägeçä yöz yarım çaması xalıq cıyılsada miting bik sülpän bardı. Oyıştıruçılar wäkile häm çığış yasawçı beräw genä-palatada sotsial' mäs'älälär alıp baruçı Rif Zarifullin ide. Ul soñı waqıtta Rusiä xökümäteneñ pensiälärne arttıruda kürgän çaralarına qaramastan, monetizatsiä reforması arqasında pensionerlarnı ike törgä bülüdän kiterep çığarılğan ğädelsezlek beterelmäde digän fiker äytte. Anıñ fikerençä reformada cibärelgän xatalar östenä yaña xatalar yasala. Mäs'älän invalid pensinerlarğa eşkä urnaşu mäcbüri bulıp çığarğa mömkin, ä xäzerge waqıtta taza saw keşelär eçendä eş yuq. Şuña kürä mitingta qatnaşuçılarğa taşlamalarnı aqçalaştıru turındağı yöz yegerme ikençe qanunnı ğamäldän çığaru turındağı taläplärne tuqtatmasqa çaqırdı. Şulay sülpän genä barğan mitingqa xalıq arasınnan çığıp söyläwçe can kertte. Ul üzen ğadi genä Qazan keşese Petrov dip täqdim itte. Läkin çığışı töple häm dälille buldı. Ul sannar häm faktlar belän şähär häm respublika xakimiätendäge qabiläçelekkä häm korrupsiägä misallar kiterde. Orator Däwlät Şurasına saylaw kompaniäsendä dä ışanıçlı zat bulıp qatnaşqan ikän. Anda kürgännären ul ğömere buyı at cikkän keşegä jiraf alıp kilep kürsätü tä'sire belän genä çağıştıra ala ikän. Anıñ fikerençä, Däwlät Şurasına xaqimiät kürergä telägän keşelär genä saylanğanğa kürä anda xäkimiät kertkän qanunnarğa, täqdimnärgä qarşı tawış birüçe yuq. Mitingta tağın şulay aldan äzerlänep quyılmağan çığışçılar üz tormışları belän xäkimiättäge keşelär tormışı däräcäseneñ bik zur ayırmasına zarlanıp aldılar. Miting barğan urınğa “Natsional' Bol'şevitskaya Partiä” wäkilläre kilep çıqtılar. Alarğa süz birelmäsä dä alar miting barğan urında partiägä keru ğarizaların tarattılar. Qayber mäğlümat çaralarında alarnı militsiä xezmätkärläre totqarlağan dip söyläsälär dä, mitingta mondıy cäncal çıqqanı sizelmäde. Miting şulay tınıç qına bardı häm tämamlandı. Qatnaşuçılarğa raslatılğan rezolyutsiädä töbäklär qaramağına qaldırılğan pensionerlarğa federal' byudjet xisabına pensiälärne altı yöz sumnan tuğız yöz sumğa qädär arttıru häm Qazan metrosı proyektına qurqınıçsızlıqnı arttıruçı häm çığımnarnı kimetüçe üzgäreşlär kertü taläpläre bar.Yunıs Ätnäle.

XS
SM
MD
LG