Accessibility links

җомга, 9 декабрь 2016, Казан вакыты 12:45

Möselmannarnıñ ruxi-mädäni üzäge kiräk


Küptän tügel Yekaterinburg şähärendä yaña sinagoga açıldı. Açılu tantanasında Sverdlov ölkäse gubernatorı Eduard Rossel', ölkä häm şähär xakimiäte citäkçeläre, Sverdlovski häm Verxotur'ye arxiepiskobı Vikentiy, xristian çirkäweneñ başqa citäkçeläre, Sverdlov ölkä möselmannarınıñ diniä idäräse möftie Sibgatulla xaci Säydullin qatnaştı. Törle millät wäkilläre häm törle din totuçılarnıñ tolerantlığın kürsätä torğan bu waqiğa ber yaqtan quandırsa, ikençe yaqtan qayber möselman dairäläreneñ qänäğätsezlegen tudırdı. Monıñ säbäben ber genä närsä belän añlatırğa bula.

Quätle Ural başqalasınıñ üzägen küz yawın alırday matur itep tözelgän çirkäwlär, sinagogalar bizi. Ä san yağınnan ikençe urında toruçı möselman dinen totuçılar mäçetlärne zur şähärneñ tirä-yunendä genä tözergä mäcbür. İnde niçä yıllardan birle şähär üzägendä möselmannarnıñ ruxi-mädäni üzägen tözü öçen cir alırğa mömkinçelek yuq.

Döresräge, eş beraz başqaçaraq tora. Monnan berniçä yıl elek Ural möselmannarınıñ tarixi mirası bulıp sanalğan Şeynkmana uramı, 19 yort adresı buyınça urnaşqan yarım cimerek yortnı şul uq Sibgatulla xäzrätkä birgän bulğannar. Ämma bu köngä qädär yort yañğır-qar astında tağın da cimerelep, işelep yata. Tözeleş alıp baru öçen teläkläre dä, matdi nigezläre dä bulğan möselman yegetlären ni säbäptänder yaqın da cibärmi Sibgatulla xäzrät. Xätta, qayber mäğlümatlarğa ışansañ, älege cir öçen zur ğına summada aqça sorağan digän süz dä bar.

Üteneç belän cirle idärä orğannarına möräcäğät itüneñ dä faydası yuq, xatlarğa inde möselmannarğa birelgän cir bar dip kenä cawap birälär. Şuña kürä, bu xälgä bitaraf bulmağan möselmannar, xakimiät orğannarına cämäğätçelek fikeren ireşterü niäte belän, Yekaterinburg şähäre üzägendä möselmannarnıñ ruxi-mädäni üzäge tözü öçen cir bülep birüne sorap imzalar cıya başladılar.

Bügenge köndä inde meñgä yaqın imza cıyıldı. Möselmannar, cıyın cıyıp, Yekaterinburg şähär xakimiäte başlığına häm yaña saylanğan şähär Duması deputatlarına möräcäğät qabul itärgä uylıylar.

XS
SM
MD
LG