Accessibility links

шимбә, 3 декабрь 2016, Казан вакыты 05:37

Tarixi miraslar kem öçen?


Ural başqalası bulıp sanalğan Yekaterinburg şähärendä tarixi miras isemlegenä kertelgän binalar bik küp. Alar arasında biredä yäşäwçelär öçen bik tanış Tınıçlıq häm Duslıq yortı, Puşkin yortı, Profsoyuzlar yortı... Barısı da şähärneñ näq üzägendä urnaşqan, üzençälekle arxitektura bizäklärenä bay bulğan yortlar.

Soñğı waqıtlarda Ural başqalasında şuşı yortlar tiräsendä zur ığı-zığı bara. Barısı da Rusiä milek mönäsäbätläre ministrlığı häm mädäniät ministrlığı qarşında “Tarixi häm mädäni häykällärne qullanu belän citäkçelek itü agentlığı” tözelü belän başlandı.

Rusiäneñ başqa töbäklärendä niçekter, ä menä agentlıqnıñ Ural bülekçäse citäkçese Vera xanım Korotkova, qulına wäqälät kilep kerü belän älege binalarnı moña qädär xalıq öçen eşläp kilgän oyışmalardan tiz genä buşatıp quydı. Törle milli oyışmalarnıñ tuğan oyası bulıp sanalğan Tınıçlıq häm Duslıq yortı da, bay kitapxanäse belän dan totqan, studentlar, balalar yaratıp yörgän, küptörle icadi şiğriät kiçäläre, oçraşular uzdırıla torğan Puşkin yortı häm başqa xalıqqa xezmät itä torğan oyışmalar “uramda” qaldı.

Agentlıq citäkçeläre bu başqa sıymıy torğan eşne “tarixi häykällärne, istälekle mirasnı saqlaw, restavratsiälätü öçen, başbaştaq oyışmalardan saqlap qalıp, arenda xaqın daimi tüli ala torğan keşelärgä tapşıru” dip añlata. Bu oçraqta ber närsä borçıy: barlıq binalarnı da arendağa alırğa cıyınğan arendatorqnıñ iseme ber ük. Bu oçraqlı xäl tügelder. Xäzer arenda öçen bik zur külämdä aqçalar wäğdä itkän qalın kesäle ağaynıñ annan soñ şähär urtasındağı güzäl obyektlarnı üz milegenä satıp alu yulı tabılmasmıni? Zur appetitlı qalın kesäle ağaylar monıñ da yulın tabar...

Ä ğadi xalıq wäkillärenä, bu mädäni mirasnı moña qädär saqlap kilüçelärgä qaya barırğa?

Bu soraw bügengä qädär açıq bulıp qala birä. Xäzer eş xoquq saqlaw orğannarı qaramağında. Sud nindi qarar çığarır.

Fäwiä Safiullina. Yekaterinburg.

XS
SM
MD
LG